21 октябри соли 2026 Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Кодекси экологии Ҷумҳурии Тоҷикистон имзо гузоштанд. Кодекси мазкур аз ҷумлаи қонунҳое мебошад, ки аз ҷониби Маҷлиси намояндагони Маҷлиси Олии Ҷумҳурии Тоҷикистон қабул ва аз ҷониби Маҷлиси миллии Маҷлиси Олии Ҷумҳурии Тоҷикистон ҷонибдорӣ гардидаанд. Кодекси экологӣ ба такмили заминаи ҳуқуқии ҳифзи муҳити зист, истифодаи оқилонаи захираҳои табиӣ ва таъмини амнияти экологӣ равона гардидааст. Қабули чунин санад барои ҳамоҳангсозии муносибатҳои ҳуқуқӣ дар соҳаи экология ва муайян намудани асосҳои танзими фаъолияти вобаста ба ҳифзи табиат аҳаммияти муҳим дорад. Масъалаҳои пешгирии ифлосшавии муҳити зист, ҳифзи захираҳои обу замин, нигоҳдории гуногунии биологӣ ва истифодаи самараноки сарватҳои табиӣ аз самтҳои муҳими рушди қонунгузории экологӣ ба шумор мераванд. Дар шароити тағйирёбии иқлим ва афзоиши таъсири фаъолияти инсон ба муҳити зист, такмили механизмҳои ҳуқуқии ҳифзи табиат ва баланд бардоштани масъулияти истифодабарандагони захираҳои табиӣ аҳаммияти бештар пайдо мекунад. Татбиқи муқаррароти Кодекси экологӣ ва риояи талаботи қонунгузорӣ метавонад ба беҳтар гардидани низоми ҳифзи муҳити зист, таҳкими назорати экологӣ ва баланд бардоштани маърифати экологии аҳолӣ мусоидат намояд.

  Дар Сарраёсати ҳифзи муҳити зисти вилояти Суғд санаҳои 19-20 октябр  бо мақсади баланд бардоштани сатҳи дониш ва малакаи амалии мутахассисон дар самти таҳия, банақшагирӣ, татбиқ ва мониторинги барномаҳои маҳаллӣ оид ба маърифати экологӣ, тағйирёбии иқлим ва ташаккули фарҳанги экологии аҳолӣ бо ташаббуси Кумитаи ҳифзи муҳити зисти назди Ҳукумати Ҷумхурии Тоҷикистон  ва дастгирии  Созмони Амният ва ҳамкорӣ дар Аврупо (САҲА) дар шаҳри Душанбе семинар-тренинг баргузор гардид. Дар кори семинар муовини раиси Кумитаи ҳифзи муҳити зисти назди Ҳукумати Ҷумҳурии Тоҷикистон  Гулрухсор Тиллоӣ, намояндаи Дафтари САҲА дар шаҳри Душанбе Баҳринисо Нарзулоева, масъулон аз раёсати маорифи вилоят ва шаҳри Хуҷанд, шуъбаи рушди сайёҳии МИҲД вилоят,  Раёсати тандурустӣ ва Раёсати кор бо занон ва оилаи вилоят, рўзномаҳои вилоятӣ, телевизиони 7 Ситора, омўзгорон ва донишҷуёни Донишкадаи кӯҳию металлургии Тоҷикистон ва Донишкадаи политехникии Донишгоҳи техникии Тоҷикистон ба номи академик М.С. Осимӣ,  Ташкилоти ҷамъиятии “Гурўҳи ҷавонон оид ба ҳифзи муҳити атроф”, роҳбарон ва намояндагони шуъбаҳо ва бахшҳои ҳифзи муҳити зист дар шаҳру ноҳияҳо  иштирок доштанд.

  Санаи 1 октябри соли 2026 дар толорҳои Маркази таълимии Бонки миллӣ дар шаҳри Гулистон «Форуми IV-уми минтақавии ҷавонони ҳавзаи дарёи Сир – 2026» бо мақсади баланд бардоштани иштироки ҷавонон дар масъалаҳои идоракунии комплексии захираҳои об ва ҳифзи муҳити зист баргузор гардид. Дар форум 170 нафар, аз ҷумла намояндагони ҳаракати ҷавонони «Нозирони сабз» аз Ҷумҳуриҳои Тоҷикистон, Ӯзбекистон ва Қирғизистон, омӯзгорон, коршиносон, мақомоти давлатӣ, шарикони рушд ва дигар ташкилотҳои манфиатдор иштирок доштанд. Рафти чорабинии мазкур иштирокчиён масъалаҳои вобаста ба истифодаи оқилона ва ҳифзи захираҳои об, ҳифзи муҳити зист, тағйирёбии иқлим ва рушди устуворро баррасӣ намуда, таваҷҷуҳи махсус ба нақши ҷавонон ва иштироки амалии онҳо дар ҳалли масъалаҳои экологӣ зоҳир гардид.

  Дар толори Сарраёсати ҳифзи муҳити зисти вилояти Суғд  ҷаласаи мақомоти ҳифзи муҳити зист оид ба ҷамъбасти фаъолияти нуҳ моҳи соли 2026 бо иштироки сардори Сарраёсат Суҳроб Холзода, муовин, сардорони шуъбаҳои назоратӣ, роҳбарони зерсохторҳо ва кормандон баргузор гардид. Сардори сарраёсати ҳифзи муҳити зист дар вилояти Суғд  Холзода С.Х. пас аз шунидани маърӯзаи таҳлилӣ бо сардорони шуъбаҳои назоратӣ ва роҳбарони зерсохторҳо дар шаҳру ноҳияҳо оид ба фаъолияти мақомот дар давраи ҳисоботӣ музокира намуд.  Ҳамзамон ҷиҳати беҳтар ба роҳ мондани фаъолияти нозирӣ, ҳамҷоя бо сохторҳои масъул назорати иҷрои босифати Барномаҳои давлативу соҳавӣ, ситонидани маблағи ҷаримаву зарарҳои пешни-ҳодшуда, корбарӣ дар самти низоми иҷозатдиҳӣ ва ислоҳи камбудиҳои ҷойдошта то ҷамъбасти ҳисоботи солона дастуру супоришҳо дод.   Дар интиҳои ҷаласа яке аз кормандони ботаҷрибаи соҳаи  хифзи муҳити зист Собиров Ҳабибулло дар фазои тантанавӣ ба нафақа гусел карда шуд. Роҳбарияти сарраёсат ба Собиров Ҳабибулло барои хизматҳои  содиқонаву тӯлонӣ дар мақомоти ҳифзи муҳити зист миннатдорӣ баён намуда, изҳори боварӣ карда шуд, ки дар оянда низ бо таҷрибаи бойи худ ба кормандони ҷавони мақомот роҳнамо хоҳад шуд.

  22 сентябри соли 2026 Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои рушди соҳаи моҳипарварӣ дар шаҳри Хуҷанд тавассути 4 ҳавз ба дарёи Сир 1 миллион моҳича сар доданд. Моҳичаҳо аз зотҳои амури сафед, пешонапаҳни сафед ва зағорамоҳӣ мебошанд, ки дар коргоҳҳои моҳичапарварии шаҳру ноҳияҳои вилоят парвариш ёфтаанд. Тадбирандешии мазкур дар доираи ҳидоятҳои Пешвои миллат муҳтарам Эмомалӣ Раҳмон аз ҷониби Мақомоти иҷроияи ҳокимияти давлатии вилояти Суғд ва Кумитаи ҳифзи муҳии зисти назди Ҳукумати Ҷумҳурии Тоҷикистон ба хотири афзоиш додани саршумори моҳӣ дар дарёи Сир роҳандозӣ гардидааст. Дар ҳамин ҷо, дар 5 аквариум намудҳои моҳӣ аз оилаи амури сафед, пешонапаҳни сафед ва зағорамоҳӣ муаррифӣ карда шуд, ки дар коргоҳҳои истеҳсоли моҳӣ ва хоҷагиҳои моҳипарварии вилоят парвариш меёбанд.