Санаи 10.05.2019, дар маркази бозомўзии Раёсати ҳифзи муҳити зисти вилояти Суғд дар шаҳри Гулистон маҷлиси машваратии назди сардор бо иштироки муовин, сардорони шуъба ва сармутахассисони раёсат, сардорони шуъбаҳо ва мудирони бахшҳои ҳифзи муҳити зисти шаҳру ноҳияҳо баргузор гардид. Мувофиқи нақша дар маҷлис баррасии 3 масъала пешбинӣ гардида, дида баромада шуд: 1) оид ба масъалаи пешгирӣ ва муқовимат бо коррупсия; 2) натиҷабардорӣ аз фаъолияти раёсат дар чор моҳ ва вазифаҳо то ҷамъбасти фаъолият дар 6 моҳи аввали соли равон; 3)  омодагӣ ба 5 июн – Рӯзи байналмилалии муҳити зист ва масъалаҳои ҷорӣ.

Нисбати масъалаи якум ҳуқуқшиноси раёсат сухан намуда қайд кард, ки пешгирӣ ва муқовимат бо коррупсия яке аз масъалаи асосӣ буда, бояд дар мадди аввали фаъолияти кормандони мақомоти ҳифзи муҳити зист қарор гирад. Кормандони раёсат ва зерсохторҳо мансуб ба хизматчиёни давлатӣ мебошанд ва ин мақом вазифадор менамояд, ки талаботи Қонуни Ҷумҳурии Тоҷикистон «Дар бораи мубориза бар зидди коррупсия» ва «Стратегияи муқовимат бо коррупсияи Ҷумҳурии Тоҷикистон барои солҳои 2013-2020»-ро қатъиян риоя ва иҷро карда шавад.

Ҳамасола санаи 15–уми апрелро дўстдорони табиат чун Рўзи умумиҷаҳонии дониши экологӣ таҷлил менамоянд. Ин иқдом соли 1992, зимни баргузории Конфронси СММ дар шаҳри Рио-де-Жанейро, ки масъалаҳои доғи рушди устувори аҳли башар муҳокима мегардид, ба ҳукми анъана даромад.

Раёсати ҳифзи муҳити зисти вилояти Суғд якҷоя бо кафедраи экология ва ҳифзи табиати факултети геоэкологияи МДТ «ДДХ ба номи Б.Ғафуров» дар моҳи апрели соли равон бахшида ба ин санаи муҳими экологӣ гузаронидани конференсияро пешбинӣ карда буд.

Санаи 29.04.2019 дар толори калони раёсати Донишгоҳ конференсияи илмӣ-амалӣ таҳти унвони «Роҳҳои беҳтар намудани маърифати экологии аҳолӣ» баҳри татбиқи нуктаҳои Паёми навбатии Пешвои миллат, Президенти мамлакат муҳтарам Эмомалӣ Раҳмон ва бахшида ба эълон гардидани солҳои 2019-2021«Солҳои рушди деҳот, сайёҳӣ ва ҳунарҳои мардумӣ», таъмини иҷрои талаботи «Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон дар давраи то соли 2020»баргузор гардид.

Раёсати ҳифзи муҳити зисти вилояти Суғд бо мақсади беҳтар намудани ҳолати экологӣ, тозаву обод нигоҳ доштани муҳити зист дар шаҳру ноҳияҳои вилоят ва баҳри иҷрои фармоиши Раиси Кумитаи ҳифзи муҳити зисти назди Ҳукумати Ҷумҳурии Тоҷикистон аз 24.01.2019, №07  дар бораи гузаронидани аксияи «Тозагии маҳал» мунтазам корбарӣ намуда истодааст. Мувофиқи ҷадвали баргузории аксияи «Тозагии маҳал» дар ҳудуди ҳар як шаҳру навоҳии вилоят дар як моҳ ду маротибагӣ чунин аксия гузаронида шуда, корҳои кабудизоркунию ободонӣ, таъмири биною иншоотҳо, тоза намудани гирду атрофи идораҳо, иншоотҳои иҷтимоию кўчаю хиёбонҳо, обод намудани гулгашт ва боғҳои истироҳатию фароғатӣ, кашонидани партовҳо аз кўчаҳои ҷамоат ва тоза намудани ҳудудҳои манбаъҳои обӣ, насби шиору овезаҳо ба иҷро расонида мешаванд.

Дар асоси фармоиши сардори Раёсати ҳифзи муҳити зисти вилояти Суғд аз 20.03.2019, №21 «Оид ба амалӣ гардонидани чорабиниҳои ҳифзкунандаи захираҳои моҳӣ дар давраи тухмгузории соли 2019» аз 1 апрел то 15 июни соли ҷорӣ дар ҳавзаи дарёи Сир ва дигар дарёҳо, обанборҳо, сойҳо ва кӯлҳои ҳудуди вилоят сайди моҳӣ аз тарафи шахсони ҳуқуқию воқеӣ манъ карда шуд. Барои амалӣ гаштани нақшаи чорабиниҳо ситод дар ҳайати 16 нафар бо роҳбарии сардори раёсат ташкил ва корбарӣ намуда истодааст.

Дар моҳи апрели соли ҷорӣ баҳри ҳифзи захираҳои моҳӣ, ба танзим даровардани моҳидорӣ ва самаранок истифодабарии захираҳои  моҳии обанбори «Баҳри Тоҷик» ва ҳавзаи Сирдарё аз ҷониби нозирони мақомоти ҳифзи муҳити зист 52 маротиба амалиёти фаврӣ гузаронида шуда, 35 санади азназаргузаронӣ тартиб дода шуд. Ҳамчунин, нисбати қонунвайронкуниҳои ошкоргардида 7 адад мавод тартиб ва барои чораҷӯӣ ба мақомоти прокуратура супорида шуд. Дар натиҷа нисбати 4 нафар сокинони шаҳри Конибодом ва 1 нафар сокини ноҳияи Б.Ғафуров парвандаи ҷиноӣ бо моддаи 230-и Кодекси ҷиноятии Ҷумҳурии Тоҷикистон оғоз гардид.