Иди бонувон - Рўзи Модар дар оғози эҳёи табиат, фасли баҳори фаррухқадам фаро мерасад, ки мардуми шарафманди мо онро ҳамчун яке аз арзишмандтарин идҳои умумихалқӣ ҷашн мегиранд. Бо иқдоми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ин санаи муқаддас, саодатмандиву сарбаландии занону модарони тоҷик ва аҳли хонадони онҳо, дар маҷмӯъ омили муҳими пешрафту ободии Ватани маҳбубамон – Тоҷикистони соҳибистиқлол мебошад. Тамоми ҷомеаи мо дарк менамояд, ки ҳар як модар шоистаи таҳсин, сазовори ситоиш, арзандаи эҳтиром ва арҷ гузоштан аст. Ба ифтихори бузургдошти ин иди фархунда Шуморо самимона табрик гуфта, бароятон тансиҳативу бахту иқболи нек, рӯзгори обод ва сулҳу осоиш орзу менамоям.

  Тибқи нақшаи корӣ ва дар асоси фармоиши сардори Раёсати ҳифзи муҳити зисти вилояти Суғд оид ба гузаронидани амалиётҳои фаврии шабонарўзӣ дар самти ҳифзи захираҳои моҳӣ дар обанбори «Баҳри Тоҷик» аз ҷониби нозирони шуъбаи назорати давлатии истифода ва ҳифзи олами набототу ҳайвонот ва захираҳои моҳӣ чунин амалиётҳо мунтазам гузаронида шуда истодааст. Санаи 3.03.2021, ҳангоми чунин амалиёт ду нафар сокини шаҳри Конибодом – Содиқов Ҷ.Л., истиқоматкунандаи ҷамоати деҳоти Лоҳутӣ ва Худойбердиев Ҳ., истиқоматкунандаи ҷамоати деҳоти Ҷаҳонзеб барои вайрон кардани қоидаҳои моҳидорӣ ва истифодаи лавозимотҳои моҳидории ғайриқонунӣ боздошт карда шуданд. Дар натиҷа, бо дастрасии моддаи 208 Кодекси Ҷумҳурии Тоҷикистон «Дар бораи ҳуқуқвайронкунии маъмурӣ» протоколҳо тартиб дода, қаиқҳои резинӣ ва тўрҳои хархела муваққатан ба анбори раёсат супорида шуд.

  Бо мақсади сазовор таҷлил намудани ҷашни Наврӯзи байналмилалӣ,  ободу зебо гардонидани  боғҳову ҷойҳои ҷамъиятӣ  дар ҳудуди боғи фарҳангӣ фароғатии ба номи С.Айнии ноҳияи Зафаробод ҳашари ниҳолшинонӣ гузаронида шуд. Дар ҳашар кормандони бахши ҳифзи муҳитизист якҷоя бо кормандони боғзиёдааз 300 адад дарахтони ҳамешасабзи сановбар шинониданд. Тибқи маълумоти бахши ҳифзи муҳити зист дар ноҳия то имрӯз  6800 бех ниҳолҳои сояафкану ҳамешасабз, ороишӣ ва мевадиҳанда шинонида шудаанд.

  Бо мақсади сазовор пешвоз гирифтани Иди байналмилалии Наврӯз, кам намудани ихроҷи моддаҳои зараровар ба ҳавои атмосфера, тибқи нақшаи корӣ бо иштироки кормандони бахши ҳифзи муҳити зист якҷоя бо кормандони БДА дар шоҳроҳи Панҷакент - Айнӣ амалиёти «Ҳавои тоза» гузаронида шуд. Рафти амалиёт 30 адад нақлиётҳои автомобилии тамғаашон гуногун аз санҷиши аналитикӣ гузаронида шуда, нисбати ронандаи 1 адад воситаҳои нақлиёти автомобилие, ки меъёри стандартҳои давлатиро вайрон карда, партови моддаҳои ифлоскунандаро (гази СО) ба фазои атмосфера барзиёд ихроҷ кардаанд, протоколҳои ҳуқуқвайронкунии маъмурӣ тартиб дода шуда, барои чораандешӣ ба БДА-и шаҳр ирсол гардид.