Все статьи

10 February 2026

Нишасти матбуотии якҷояи чор сохтори вилоятӣ

Подробности статьи: Автор; Категория News

Тибқи ҷадвали тасдиқгардидаи мақомоти иҷроияи ҳокимияти давлатии вилояти Суғд санаи 9 феврали соли 2026 дар толори маҷлисгоҳи калони Сарраёсати ҳифзи муҳити зист дар вилоят нишасти матбуотии якҷояи чор сохтори вилоятӣ оид ба натиҷаҳои фаъолият дар соли 2025 доир гардид. Аз тарафи сохторҳо бевосита роҳбарон – сардори Сарраёсати ҳифзи муҳити зист дар вилоят Холзода С.Х., сардори Сарраёсати кишоварзии вилоят Қосимзода А., раиси Кумитаи идораи замини вилоят Толибзода Т., сардори Раёсати беҳдошти замин ва обёрӣ дар вилоят Ҷӯраев А. иштирок дошта, ба саволҳои намояндагони васоити ахбори омма ҷавоб пешниҳод намуданд. Ҳамчунин, дар нишасти матбуотӣ хабарнигорони воситаҳои ахбори омма, аз он ҷумла мухбирони рӯзнома ва маҷаллаҳои «Ҷумҳурият», «Садои мардум», «Народная газета», «Ҳақиқати Суғд», «Согдийская правда», «Суғд ҳақиқатӣ», «Сухани халқ», «Шӯълаи умед», «Шафақ», «Ризқофарин», «Нилуфар», «Саломат бошед», «Кишоварзӣ», «Роҳнамои кишвар», «Муҳаббат ва оила», «Кайҳон», «Бонувони Тоҷикистон», «Сайҳун», оҷонсиҳои иттилоотии «Азия плюс», «Спутник», «Суғд - пресса» телевизионҳои МД ТВ «Ҷаҳоннамо», «Сафина», «Синамо», телевизиони вилояти Суғд, ШТР «Азия», СМ-1, «Диёр», радиоҳои «Тоҷикистон», «Замон», «Пайванд», «Шаҳри ман», «Озодӣ», инчунин як ќатор рӯзноманигорони мустақил, таҳлилгар, коршинос ва мустақил, дар маҷмуъ 42 нафар намояндагон иштирок доштанд. Ба ҳамаи рӯзноманигорон варақаҳои иттилоотӣ оид ба натиҷаҳои фаъолияти чор сохтори болозикр дар соли 2025 дастрас гардид.

Мониторинги экологии минтақаҳои наздисарҳадии вилояти Суғд

Подробности статьи: Автор; Категория News

Тибқи нақшаи кори Сарраёсати ҳифзи муҳити зист дар вилояти Суғд аз ҷониби мутахассисони шуъбаи мониторинги экологӣ, таҳлилӣ ва ахбороту иттилооти сарраёсат дар минтақаҳои наздисарҳадии ноҳияҳои Спитамен ва Зафаробод мониторинги экологӣ гузаронида шуд. Санҷиши вазъи ҳаво дар 5 нуқтаи ҳудуди санитарӣ - муҳофизатӣ то хати сарҳад дар масоҳати аз 500 метр то 2 км дур амалӣ гардида, тағйирёбии тамоюли таъсир бо гирифтани 10 намунаи партовҳои моддаҳои зарарнок ба ҳавои атмосфера муайян карда шуд. Натиҷаҳои ченкунӣ нишон дод, ки миқдори нишондиҳандаҳо ба монанди аммиак (NH₃), оксиди карбон (СО), дуоксиди нитроген (NO₂), фенол (C₆H₅OH), гидрогени сулфид (H₂S), оксиди нитроген (N₂O), формалдегид (CH₂O), аммиак (NH3), гидрогенхлорид (HCl), хлор (Cl) ва чанг дар таркиби ҳавои атмосфера мутобиқи меъёр мебошанд. Ғайр аз ин, бо мақсади назорати сифат ва муайян намудани хосиятҳои физикӣ – кимиёвӣ аз 1 нуқтаи ҳавзаи дарёи Сир дар минтақаи наздисарҳадии ҳудуди ноҳияи Спитамен намунаи об гирифта, ташхис гузаронида шуд.

06 February 2026

Насби баннери таблиғотӣ дар шаҳри Истаравшан

Подробности статьи: Автор; Категория News

Бо мақсади ҷалби бештари шаҳрвандон ба корҳои кабудизоркунию ободонӣ дар маъракаи ноҳолшинонии мавсими баҳори соли 2026 ва таъмини иҷрои нақшаи амали «Барномаи давлатии кабудизоркунии Ҷумҳурии Тоҷикистон барои давраи то соли 2040», ки тибқи нақша дар соли 2026 шинонидани 64800 бех ниҳолҳо дар шаҳри Истаравшан пешбинӣ гардидааст, аз ҷониби бахши ҳифзи муҳити зист дар шаҳр як қатор тадбирҳо андешида шуда истодааст. Кормандони мақомоти ҳифзи муҳити зист барои даъвати шаҳрвандону сокинони ҷамоати шаҳраку деҳот корҳои ташвиқотӣ ва тарғиботӣ гузаронида, яке аз тадбирҳо ин аз ҷониби бахши ҳифзи муҳити зист насби лавҳаи калонҳаҷм – баннери таблиғотӣ бо шиори «Биёед дарахт шинонем» дар қадди роҳи асосии нақлиётгарди шаҳраки Истаравшан мебошад.

Дидан намудани муовини Сарвазири Ҷумҳурии Тоҷикистон Зиёзода С.Р. аз ниҳолхона – парваришгоҳи бахши ҳифзи муҳити зист дар шаҳри Исфара

Подробности статьи: Автор; Категория News

Моҳи марти соли 2025, бо мақсади татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» ва таъмини иҷрои нақшаи амал дар майдони 1 га «Ниҳолхона – парваришгоҳи бахши ҳифзи муҳити зист дар шаҳри Исфара» ташкил шуда буд. Дар ниҳолхона ғунҷоиши умумии кӯчати ниҳолҳо 28500 бехро ташкил карда, дар айни ҳол 12 намуди ниҳолҳо, аз он ҷумла санавбар, ардач, туяи шарқӣ, акатсия, чинор, кастона, каталпаи зебо, булут, бирючинаи ҳамешасабз, павлония, сирени ҳиндӣ ва қаламчаи сафедор, ҳамагӣ ба миқдори 28000 бех парвариш ёфта истодааст. Муовини Сарвазири Ҷумҳурии Тоҷикистон Зиёзода С.Р., Вазири кишоварзӣ Ҳакимзода Қ. ва раиси шаҳри Исфара Ҷумъазода Ш. аз ҳолати ниҳолхона – парваришгоҳ дидан намуданд. Ҳангоми дидани ниҳолхона аз ҷониби мудири бахши ҳифзи муҳити зист дар шаҳри Исфара Ҳомидов Н. ба ташрифовардагон дар бораи корҳои ба анҷом расонида, ҳолати ниҳолҳои парвариш ёфтаистода ва нақшаҳои минбаъда вобаста ба ниҳолшинонӣ маълумот пешниҳод гардид.

30 January 2026

Санаи экологӣ 2 феврал – Рузи умумиҷаҳонии заминҳои обиву ботлоқӣ

Подробности статьи: Автор; Категория News

Ҳамасола санаи 2 феврал аз соли 1997 инҷониб аз тарафи ҷомеъаи ҷаҳонӣ ҳамчун Рӯзи умумиҷаҳонии заминҳои обию ботлоқӣ (WorldWetlandsDay) таҷлил карда мешавад. Ҳадафи ин ҷашн ҷалби таваҷҷуҳи ҷомеа ва Ҳукумати кишварҳо ба муаммоҳои заминҳои обию ботлоқӣ мебошад, ки барои рушди устувори сайёра нақши хеле муҳимро иҷро мекунад. Соли 1971 дар Эрон Конвенсияи Созмони Миллали Муттаҳид оид ба муҳофизати мавзеъҳои обию ботлоқӣ аз ҷониби 18 кишвар имзо шуда, соли 2000-ум шумораи кишварҳои аъзо ба 119 расид. Имрӯз бошад 159 кишвар ба узвияти Конвенсияи Ромсар ҳамроҳ гаштаанд. Шумораи мавзеъҳои обию ботлоқие, ки дар таҳти муҳофизат қарор гирифтааст 1869 адад буда, майдони умумиашон 1836000 километри мураббаъро ташкил мекунад. Шароитҳои табиии ин мавзеъҳо барои зисти бисёр намуди парандаҳо, ҳашарот, моҳӣ ва дигар ҳайвонот мувофиқ аст. Инчунин заминҳое, ки ба рӯйхати мавзеъҳои обию ботлоқӣ дохил мешаванд, дорои захираҳои маъданҳои фоиданок мебошанд. Тоҷикистон чун ҷузъи ҷомеъаи ҷаҳонӣ ва ҳамчун давлати соҳибистиқлол ба Конвенсияи Созмони Миллали Муттаҳид оид ба муҳофизати заминҳои обию ботлоқӣ 9-уми марти соли 2001 шомил шудааст. Баъд аз ҳамроҳ гаштани Тоҷикистон ба Конвенсияи Ромсар аз ҷониби муттахассисони соҳа панҷ номгӯи мавзеъҳои обию ботлоқии ҷумҳурӣ, ки аҳамияти байналмилалӣ доранд, аз он ҷумла кӯли Қароқӯл, Шоркӯл, Рангкӯл, Зоркӯл ва обанбори Қайроққум ба қайд гирифта шуд. Маврид ба тазаккур аст, ки ҳамаи мавзеъҳои обию ботлоқии дар ҷумҳурӣ мавҷудбуда, дар тобеияти заминҳои муассисаи ҳудудҳои табиии махсус муҳофизатшаванда ҷойгир шуда, масоҳат вобаста ба оби обанбор дар ҳудуди 3 - 5 ҳазор гектар мебошад. Ба ҷуз аз мавзеъҳои дар боло номбаршуда, дар ҳудуди кишварамон дигар мавзеъҳои обию ботлоқӣ мавҷуданд, ба монанди мамнӯъгоҳи «Бешаи палангон», кӯли Яшилкул, Искандаркӯл ва дигар мавзеъҳое, ки аҳамияти байналмилалӣ доранд ва онҳоро низ метавон дар рӯйхати Конвенсияи Ромсар ворид кард.

Идомаи амалиёти «Ҳифзи ҳайвоноту парандагони ваҳшӣ» дар минтақаҳои кӯҳии шаҳру ноҳияҳои вилояти Суғд

Подробности статьи: Автор; Категория News

Дар рӯзҳои паст фаромадани ҳарорат, боришоти барф ва сард омадани обуҳавои моҳи январи соли 2026 дар минтақаҳои кӯҳии шаҳру ноҳияҳои Исфара, Конибодом, Деваштич, Ашт ва дуюм маротиба Истаравшан аз ҷониби зерсохторҳои Сарраёсати ҳифзи муҳити зист дар вилояти Суғд баргузории амалиёти «Ҳифзи ҳайвонот ва парандагони ваҳшӣ» идома дода шуд. Ҳангоми гузаронидани корҳои биотехникӣ бо мақсади беталаф баровардани ҳайвоноти ваҳшӣ ва парандагон аз сармои зимистон таъминот бо хӯроки иловагӣ ба амал омада, ҳаҷми маводу намуди маҳсулоти зерин истифода гардид: дар шаҳри Исфара - 250 кг-мӣ гандум ва ҷав, 200 кг маккадона, 100 кг намак, 150 кг-мӣ сабӯс ва хӯроки омехта, 100 кг сабзӣ ва 20 банд бастаи беда; дар шаҳри Истаравшан - 90 кг-мӣ гандум ва ҷав, 40 кг намак, 80 кг-мӣ сабӯс, 20 бандӣ бастаи каҳ ва беда; дар шаҳри Конибодом - 400 кг гандум, 200 кг-мӣ ҷав ва маккадона; дар ноҳияи Деваштич - 300 кг-мӣ гандум ва ҷав, 50 кг намак, 250 кг сабзӣ, 20 банд бастаи каҳ ва 15 банд бастаи беда; дар ноҳияи Ашт - 270 кг гандум, 880 кг маккадона, 185 кг намак ва 200 банд бастаи алаф. Марид ба қайд аст, ки дар минтақаҳои баландкӯҳ ва доманакӯҳҳои шаҳру ноҳияҳои Панҷакент, Истаравшан, Исфара, Конибодом, Деваштич, Ашт, Шаҳристон, Ҷ.Расулов, инчунин дар минтақаҳои болооб ва соҳилҳои обанбори «Баҳри Тоҷик» давоми як моҳ, ҳамагӣ 11 маротиба амалиёти «Ҳифзи ҳайвонот ва парандагони ваҳшӣ» ташкил ва гузаронида шуд.

28 January 2026

Дар муассисаи таълимии шаҳри Гулистон оид ба ташвиқу тарғиби нуқтаҳои асосии Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вохӯрӣ баргузор гардид

Подробности статьи: Автор; Категория News

Бо мақсади иҷрои нақшаи корӣ ва супориши протоколии Кумитаи ҳифзи муҳити зисти назди Ҳукумати Ҷумҳурии Тоҷикистон аз тарафи Сарраёсати ҳифзи муҳити зист дар вилояти Суғд ба зерсохторҳо дар шаҳру ноҳияҳо доир ба омӯзиши матн ва ташвиқу тарғиби нуқтаҳои асосии Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ба Маҷлиси Олии мамлакат санаи 16 декабри соли 2025 баён гардид,ҷиҳати гузаронидани вохӯриҳо дар муассисаҳои таълимии соҳаи маориф ва дигар муассисаю ташкилоти ҳудуди маҳал, аз ҷумла бо ҷалби намояндагони КИ ҲХДТ, устодон, омӯзгорону коршиносон барқияи фаврӣ ирсол гардид. Дар ҳамкорӣ бо шуъбаи маорифи шаҳр аз ҷониби кормандони бахши ҳифзи муҳити зист дар шаҳри Гулистон вохӯрӣ бо хонандагони муассисаи таҳсилоти миёнаи умумии № 1 ташкил ва гузаронида шуд. Дар рафти вохӯрӣ ба иштирокдорон оид ба нуқтаҳои асосии Паёми навбатии Пешвои миллат, ташаббусҳои Тоҷикистон ва қабули қатъномаи Маҷмаи Умумии Созмони Милали Муттаҳид доир ба «Ҳифзи пиряхҳо ва криосфера, бахусус, дар минтақаҳои кӯҳӣ» ва дар бораи дигар масъалаҳои вобаста ба баланд бардоштани масъулияти шаҳрвандӣ суханронӣ карда шуд.

26 January 2026

Маъракаи ниҳолшинонӣ дар шаҳру ноҳияҳои вилояти Суғд

Подробности статьи: Автор; Категория News

Бо мақсади татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» ва таъмини иҷрои нақшаи амали соли 2026 дар шаҳру ноҳияҳои вилоят ҳар ҳафта, вобаста аз обу ҳаво чорабиниҳои шинонидани ниҳолҳои намуди ороишии ҳамешасабз гуаронида шуда истодааст. Дар шаҳри Гулистон ҳангоми ду маротиба гузаронидани аксияи ниҳолшинонӣ дар ҳудуди боғи назди кӯчаи ба номи А.Ҷомӣ, дар назди дидбонгоҳи Бозрасии давлатии автомобилӣ ва гардиши минтақаи истироҳатии шаҳр 510 бех ниҳолҳои намуди санавбар ва 200 бех намуди ардач бо иштироки раиси шаҳр шинонида шудааст. Ҳамзамон, дар даромадгоҳи ҷамоати шаҳраки Адрасмони шаҳри Гулистон бо иштироки Раиси вилояти Суғд, раиси шаҳр ва сокинони ҷамоати шаҳрак 55 бех ниҳоли дарахтони ҳамешасабзи ороишии санавбар шинонида шуд. Дар шаҳри Исфара чорабинии ниҳолшинонӣ бо иштироки 350 нафар шаҳрвандон ба амал омада, дар рафти он 2000 бех ниҳолҳои дарахтони ҳамешасабзи ороишии санавбар шинонида шуд ва баргузории чунин чорабинӣ бо нинонидани ниҳолҳои дарахтони ҳамешасабз дар қадди шоҳроҳи Душанбе – Хуҷанд – Чаноқ дар ноҳияи Шаҳристон низ амалӣ гардидааст. Маъракаи ниҳолшинонӣ дар миқёси вилояти Суғд идома ёфта тибқи нақшаи пешбинигардидаи мақомоти ҳифзи муҳити зист то охири моҳи январ маълумоти ҳамаи ниҳолҳои давоми моҳ шинонидашуда ҷамъбаст гардида, минбаъд оғоз аз моҳи феврал шаҳру ноҳияҳо оид ба рафти иҷрои нақшаи ниҳолшинонии соли 2026 дар доираи «Барномаи давлатии кабудизоркунии Ҷумҳурии Тоҷикистон барои давраи то соли 2040» ҳар 10 рӯз ба сарраёсат маълумоти хаттӣ пешниҳод менамоянд.

Дар ноҳияҳои Шаҳристон ва Ҷ.Расулов амалиёти «Ҳифзи ҳайвоноту парандагони ваҳшӣ» гузаронида шуд

Подробности статьи: Автор; Категория News

Бо тағйир ёфтани обу ҳаво, паст фаромадани ҳарорат ва боришоти барф масъалаи беталаф баромадани ҳайвоноти ваҳшӣ ва парандагон аз сармои фасли зимистон ба миён омада, гузаронидани амалиёти «Ҳифзи ҳайвоноту парандагони ваҳшӣ» идома дода шуд. Бо иқдом ва иштироки нозирони Сарраёсати ҳифзи муҳити зист дар вилояти Суғд ва бахши ҳифзи муҳити зист дар ноҳияи Шаҳристон дар якҷоягӣ бо кормандони Муассисаи давлатии хоҷагии ҷангали ноҳия дар ҳудуди мавзеъи «Хуррамдара» ва «Дараи сабз» корҳои биотехникӣ ба амал омад. Бо мақсади беҳтар намудани вазъи сукунати олами ҳайвоноти ваҳшӣ дар сармои фасли зимистон, ҳангоми баргузории амалиёт минтақаҳо ва маконҳои зисти ҳайвоноти ваҳшӣ бо хӯроки иловагӣ ба миқдори резаи гандум ва ҷав – 250 кг-мӣ, маккадона ва намак - 50 кг-мӣ, сабзӣ - 150 кг, карам ва картошка - 500 кг-мӣ, 15 ададӣ бастаи каҳ ва беда таъмин карда шудаанд. Ҳамчунин дар ноҳияи Ҷ.Расулов низ кормандони бахши ҳифзи муҳити зист якҷоя бо намояндагони Ҷамъияти шикорчиён ва моҳидорон дар минтақаҳои кӯҳии ноҳия корҳои биотехникиро гузарониданд. Дар ҷойҳои сукунати намудҳои гуногуни ҳайвоноти ваҳшӣ ва парандагон ҳаҷми таъминот бо хӯроки иловагӣ 200 кг гандум, 100 кг сабӯс ва 16 адад бастаи алафро ташкил намуд. Дар баробари ин бо мақсади пешгирии шикор ва сайди ғайриқонунии моҳӣ аз ҷониби нозирони мақомоти ҳифзи муҳити зист дар ноҳияи Ҷ.Расулов, дар минтақаҳои соҳили дарёи Сир амалиёти назоратӣ гузаронида шуда, дар рафти он байни шикорчиёну моҳидорони ҳаваскор доир ба қоидаҳои амалкунанда ва талаботи қонунгузорӣ дар самти ҳифзи олами набототу ҳайвонот корҳои фаҳмонидадиҳӣ амалӣ гардид.

Дар як қатор муассисаҳои томактабии шаҳру ноҳияҳои вилояти Суғд дарсҳои экологӣ оғоз гардид

Подробности статьи: Автор; Категория News

Иқдоми мазкур аз ҷониби Сарраёсати ҳифзи муҳити зист дар вилояти Суғд дар доираи татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021–2025» пешбинӣ ва амалӣ гардида, ҳадафи баланд бардоштани сатҳи маърифати экологӣ ва ташаккули фарҳанги муносибати масъулона ба табиат дар ҷомеаро дошт. Дар ҳамбастагӣ бо Ташкилоти ҷамъиятии «Гуруҳи ҷавонон оид ба ҳифзи муҳити атроф» ва Раёсати маорифи вилоят дар 5 муассисаҳои томактабии шаҳру ноҳияҳои Хуҷанд, Б.Ғафуров, Истиқлол, Бӯстон ва Гулистон, ки дар доираи лоиҳа ҳамчун пилотӣ интихоб гардидаанд, машғулиятҳои нави экологӣ ба таври озмоишӣ роҳандозӣ карда шуд. Барои гузаронидани дарсҳои экологии мазкур дар ҳамкорӣ бо методистон ва мутахассисони Раёсати маорифи вилоят махсусан як дастурамал - «Роҳнамо оид ба тарбияи экологӣ дар муассисаҳои томактабӣ» давоми соли 2025 таҳия гардид, ки минбаъд ҷиҳати шавқовар, дастрас ва бо тарзи муосир ташкил намудани машғулиятҳо ба мураббиёни кӯдакистонҳо кӯмак мерасонад.