Дар ноҳияи Спитамен бо мақсади пешбурди сиёсати экологӣ ду чорабинӣ – яке амалиёти «Ҳавои тоза» ва аксияи «Тозагии маҳал» бо ҷалби ҷавонони маркази ноҳия гузаронида шуд. Якҷоя бо мутахассисони шуъбаи назорати таҳлилии раёсат ва нозирони шуъбаи милитсияи экологӣ ва сайёҳии ВКД Ҷумҳурии Тоҷикистон дар вилояти Суғд, кормандони бахши ҳифзи муҳити зисти ноҳияи Спитамен тибқи нақшаи пешбинигардида амалиёти «Ҳавои тоза»-ро гузарониданд. Дар натиҷа, дар давоми амалиёт зиёда аз 40 адад нақлиёти гуногунтамға аз ченкунӣ гузаронида шуда, дараҷаи ифлоскунии ҳавои атмосфера бо партови моддаҳои зараровар муайян гардид. Боиси қайд аст, ки пас аз ислоҳ ченкунии дубораи 7 адад нақлиёт баргузор гардида, нисбати 4 нафар ронанда протоколи ҳуқуқвайронкунии маъмурӣ тартиб дода шуд.

 Дар ноҳияи Б.Ғафуров, ҳудуди ҷамоати деҳоти Исмоил Ҳамзаалиев, бо ташаббуси шуъбаи ҳифзи муҳити зисти ноҳия аксияҳои «Тозагии маҳал» ва «Тозагии соҳил» ташкил ва баргузор гардид. Баҳри тозаву обод нигоҳ доштани муҳити зист дар чорабиниҳо беш аз 300 нафар аҳолии ҷамоат, аз он ҷумла соҳибкорон иштирок намуда, корҳои назаррас ба сомон расонида шуд. Минтақаҳои маҳалли зист, қади роҳ ва заминҳои кишоварзӣ, атрофи биною иншоотҳо аз партовҳо тоза карда шудаанд. Ҳамзамон, зиёда аз 3 километр ҷўйбор ва сой аз ҳаргуна партовҳо тоза гардида, дар маҷмўъ 16,4 тонна партовҳо ба партовгоҳ бароварда шуд.

 Санаи 3 октябр дар толори маркази бозомўзӣ дар шаҳри Гулистон ҷаласаи Раёсати ҳифзи муҳити зисти вилояти Суғд оид ба ҷамъбасти натиҷаҳои фаъолият дар нўҳ моҳи соли 2020 баргузор гардид. Дар ҷаласа муовини Раиси Кумитаи ҳифзи муҳити зисти назди Ҳукумати Ҷумҳурии Тоҷикистон муҳтарам Мавлодод Абдулқодир, намояндаи бахши кишоварзии МИҲД вилояти Суғд Пўлотов Н., сардори раёсат Ҳакимзода АҚ., муовини сардори раёсат,  сардорони шуъбаьо ва сармутахассисони раёсат, сардорони шуъбаьо ва мудирони бахшҳои ҳифзи муҳити зисти шаҳру ноҳияҳо тибқи даъват иштирок доштанд.

    Дар ҷаласа маърӯзаи муовини сардори раёсат Абдумаликзода Б. «Дар бораи фаъолияти кории Раёсати ҳифзи муҳити зисти вилояти Суғд дар нўҳ моҳи соли 2020 ва вазифаҳои минбаъда» шунида ва муҳокима карда шуд. Дар охири ҷаласаи қарори дахлдор бо назардошти пешниҳоду супоришҳои додашуда қабул гардид.

 Аз тарафи кормандони мақомоти ҳифзи муҳити зист дар фаъолияти худ ба масъалаҳои пешгирии ҳодисаҳои вайрон кардани талаботи қонунҳои амалкунандаи соҳавӣ дар миқёси шаҳру ноҳияҳо аҳмияти ҷиддӣ дода мешавад. Ҳангоми амалиёти навбатӣ аз ҷониби нозирони шуъбаи ҳифзи муҳити шаҳри Хуҷанд қонунвайронкунӣ ошкор гардид. Нисбати шаҳрванд Тўйчиев Н. протокол бо дастрасии моддаи 238 Кодекси ҳуқуқвайронкунии маъмурии Ҷумҳурии Тоҷикистон барои истихроҷи ғайриқонунӣ ва кашонидани сарватҳои табиӣ – канданиҳои фоиданоки маъмули умум (санг) тартиб дода, ҷаримабандӣ амалӣ гардид.