Дар асоси нақшаи кории раёсат барои нимсолаи дуюм ва нақшаи кории МИҲД вилоят барои моҳи октябри соли равон санаи 16.10.2019 санҷиши рафти иҷрои амри Раиси вилоят аз 14.12.2015, №228 «Дар бораи таъсис додани Комиссияи байниидоравии вилоятӣ оид ба маърифати экологӣ», аз он ҷумла фаъолияти комиссияи маҳаллии мақомоти иҷроияи ҳокимияти давлатии шаҳри Конибодом ва ҳамзамон рафти ичрои қарори Раиси вилоят аз 25.05.2015, №263 оид ба татбиқи «Барномаи давлатии комплексии рушди тарбия ва маърифати экологии аҳолии Ҷумҳурии Тоҷикистон дар давраи то соли 2020» дар сохторҳои ба иҷрои бандҳои нақшаи чорабиниҳо вобаста гардида, гузаронида шуд. Маводи дахлдор дар сохторҳои МИҲД шаҳр, аз ҷумла шуъбаи умумӣ, назорат ва муроҷиати шаҳрвандон, рушди иҷтимоӣ ва робита бо ҷомеа, кор бо занон ва оила, раёсати маориф, бахши ҷавонон ва варзиш, фарҳанг, комиссияи оид ба ҳифзи ҳуқуқи кўдак, рўзномаи маҳаллии «Садои Конибодом», ширкатҳои телевизионии «Аниси Конибодом» ва «ТВ-5», ҷамоати деҳоти  Ғ.Ортиқов, Патар ва Э.Шарипов дар ҳузури роҳбарон ё шахсони мутасаддӣ мавриди санҷиш қарор гирифт.

Санаи 18 октябри соли 2019 дар дар «Қасри фарҳанг»-и ноҳияи Зафаробод аз тарафи Раёсати маорифи вилояти Суғд  бо иштироки мақомоти ҳифзи муҳити зист дар байни муассисаҳои таҳсилоти миёнаи умумӣ ва гимназияҳои шаҳру ноҳияҳо намоиши «Тирамоҳи заррин» - озмуни вилоятӣ бахшида ба Иди «Меҳргон» баргузор гардид. Дар чорабинӣ 15 адад муассисаҳои таълимӣ аз шаҳру ноҳияҳои вилояти Суғд иштирок намуда, дар мавзўъҳои экологӣ рефарат, саволу ҷавоб ва намоиш пешкаши аъзоёни ҳакамон ва иштирокчиёну тамошобинон гардид. Ҳамзамон дар рафти озмун – намоиш аз ҷониби хонандагони мактабҳо саҳначаҳо бахшида ба ҳифзи табиат, викторина ва барномаи консертӣ барои иштирокчиён пешниҳод карда шуд. Дар озмун - намоиш ҷой авввал насиби маорифчиён ва хонандагони муассисаҳои таълимии шаҳри Истаравшан, ҷойи дуюм ноҳияҳои Зафаробод, Деваштич ва шаҳри Панҷакент, ҷойи сеюм шаҳрҳои Исфара ва Конибодом гардид.

    Санаи 17.10.2019 дар Маркази Орхус дар шаҳри Хуҷанд дар доираи лоиҳаи «Баланд бардоштани маърифати экологӣ» вохўрии намояндаи Дафтари барномаҳои САҲА дар шаҳри Душанбе Келдиева Н. бо мақсади мониторинги фаъолияти иҷрочиёни лоиҳа баргузор гардид. Дар вхўрӣ намояндаи Раёсати ҳифзи муҳити зисти вилояти Суғд, шахсони масъул оид ба гузаронидани тренинг, иттилоот, мутасаддии корҳои ташкилӣ ва қисми молиявӣ иштирок доштанд. Ҳамчунин экожурналист Расулзода Т. дар мулоқоти натичаҳои татбиқи лоиҳаи мазкур ширкат варзид. Аз сабаби он, ки лоиҳа ба охир мерасад шахсони ба татбиқи лоиҳа вобастагардида барои минбаъд боз баланд бардоштани сатҳи чорабиниҳо, васеъ намудани майдони фаъолият ва фаро гирифтани миқдори бештари аҳолӣ дар масъалаҳои баланд бардоштани маърифати экологӣ фикру андешаҳои худро ба намояндаи Дафтари барномаҳои САҲА дар шаҳри Душанбе баён намуданд.

Баҳри бо дастовардҳои арзанда истиқбол гирифтани ҷашни 30-солагии Истиқлолияти давлатии Ҷумҳурии Тоҷикистон дар ҷамоати деҳоти Ошобаи ноҳияи Ашти вилояти Суғд, дар ҳудуди ҶДММ «Рахшона» ҳавзҳои моҳипарварӣ сохта ба истифода дода шуд. Бо мақсади шиносои бо ҳавзҳои моҳипарварӣ, вазъи имрўза ва минбаъдаи фаъолияти хоҷагии бисёрсоҳа Раиси вилояти Суғд Раҷаббой Аҳмадзода бо як қатор мутахассисону коршиносон ба хочагии мазкур ташриф оварда, аз ташкилу рафти кор изҳори қаноатмандӣ кард. Диққати иштирокдорон ба моҳипарварии ин хоҷагӣ ҷалб гардида, махсусан қайд карда шуд, ки 17 адад ҳавзҳо барои парвариши моҳӣ дар масофаи 44 гектар дар муҳлати кўтоҳ сохта ба истифода дода шудааст. Дар айни замон ба ҳавзҳои мазкур зиёда аз як миллион кирминамоҳии намуди амури сафед, капур, пешонипаҳни сафед ва алоча ҷойгир карда, бо хўрокаи гуногуни хушсифат ва алафҳои тару тоза таъмин гардида истодааст.