Ҳар ҳафта рӯзҳои шанбе дар шаҳри Бӯстон ҳашарҳои дастаҷамъона ва шанбегӣ бо иштироки намояндагони касбу кори гуногун, намояндагони соҳаи тиб, маориф ва сокинон гузаронида мешавад. Ҳафтаи сипаригашта дар шафати кӯли шаҳрӣ маъракаи ниҳолшинонӣ ва шанбегӣ доир гардида, дар ин мавзеъ  бо иштироки роҳбарияти шаҳр зиёда аз 250 бех ниҳолҳои ороишиву санавбар шинонида шуда,  барои риояи қоидаҳои агротехникӣ, нигоҳубини доимӣ, объёрии саривақтии ниҳолҳо  ба масъулон супоришҳо  дода шуд.

 Дар асоси нақшаи корӣ бо иқдоми шуъбаи ҳифзи муҳити зист дар шаҳри Панҷакент бо мақсадибеталаф баровардани олами ҳайвоноти ваҳшӣ аз фасли зимистон дар якҷоягӣ бо кормандони Муассисаи давлатии хоҷагии ҷангал дар гардишгоҳи №5 мавзеъи Чиларчаи Муассисаи давлатии хоҷагии ҷангал корҳои биотехникӣ гузаронида шуд. Дар ин мавзеъ ба миқдори умумии резаи гандум - 100 кг, ҷав - 70 кг, кунҷора - 80 кг, сабус - 100 кг, банди алаф - 500 кг, намак - 150 кг,ҷуворимакка - 100 кг пошида шуд. Гузаронидани корҳои биотехникӣ дар ҳолати сард омадани ҳаво дар дигар мавзеъҳои баландкуҳи Панҷакент низ дар назар аст.

 Бо мақсади тозаву обод нигоҳ доштани муҳити зист, аз партов тоза намудани маҳалҳои аҳолинишин бо иқдоми бахши ҳифзи муҳити зист дар маҳаллаи «Дӯстии халқҳо»-и шаҳраки Меҳрободи ноҳияи Ҷаббор Расулов аксияи «Тозагии маҳал ва роҳ» ташкил ва гузаронида шуд. Дар аксия 80 нафар ҳашарчиён, аз он ҷумла хонандагони синфҳои болоии муассисаи таълимии миёнаи умумии №3 ноҳия фаъолона иштирок доштанд. Рафти аксия ҳудуди маҳалла ва қадди роҳҳо аз партовҳои гуногун тоза карда шуда, 3 метри мукааб партов бароварда шуд.

 28 декабри соли 2023 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон дар Паёми худ ба Маҷлиси Олӣ соли 2024 - ро “Соли маърифати ҳуқуқӣ” эълон намуданд. Соли маърифати ҳуқуқӣ эълон гардидани соли 2024, ба 30-юмин солгарди Конститутсияи Ҷумҳурии Тоҷикистон рост омада, аз он шаҳодат медиҳад, ки Тоҷикистон кишвари ҳуқуқбунёд буда таъмини ҳаматарафаи ҳуқуқи шаҳрвандон ҳадафи асосии давлат ва ҳукумати кишвар маҳсуб меёбад. Дар партави ин иқдом, дар толори Сарраёсат вохӯрӣ бо донишҷуёни курси 4-и факултети муҳандисӣ-технологии Донишкадаи политехникии Донишгоҳи техникии Тоҷикистон ба номи академик М.С.Осимӣ аз фанни  “Асосҳои ҳуқуқи истифодабарии табиат” доир гардид. Сармутахассис оид ба ҳуқуқи Сарраёсат доир ба қонунгузории соҳа ва санадҳои меъёрию ҳуқуқии танзимкунандаи фаъолияти муҳити зист, Созишномаҳои байналмилалие, ки Ҷумҳурии Тоҷикистон ба он шомил шудаанд, иҷрои Барномаҳои давлатии соҳавӣ баромад намуд. Дар доираи мавзуъ донишҷуён низ ба суолҳои худ оид ба муаммоҳои экологии ҷойдошта ва роҳҳои ҳалли онҳо, беҳбудии муҳити атроф фикру ақидаҳои худро баён доштанд.