Январь 2026

30 Январь 2026

Идомаи амалиёти «Ҳифзи ҳайвоноту парандагони ваҳшӣ» дар минтақаҳои кӯҳии шаҳру ноҳияҳои вилояти Суғд

Подробности статьи: Автор; Категория Новости

Дар рӯзҳои паст фаромадани ҳарорат, боришоти барф ва сард омадани обуҳавои моҳи январи соли 2026 дар минтақаҳои кӯҳии шаҳру ноҳияҳои Исфара, Конибодом, Деваштич, Ашт ва дуюм маротиба Истаравшан аз ҷониби зерсохторҳои Сарраёсати ҳифзи муҳити зист дар вилояти Суғд баргузории амалиёти «Ҳифзи ҳайвонот ва парандагони ваҳшӣ» идома дода шуд. Ҳангоми гузаронидани корҳои биотехникӣ бо мақсади беталаф баровардани ҳайвоноти ваҳшӣ ва парандагон аз сармои зимистон таъминот бо хӯроки иловагӣ ба амал омада, ҳаҷми маводу намуди маҳсулоти зерин истифода гардид: дар шаҳри Исфара - 250 кг-мӣ гандум ва ҷав, 200 кг маккадона, 100 кг намак, 150 кг-мӣ сабӯс ва хӯроки омехта, 100 кг сабзӣ ва 20 банд бастаи беда; дар шаҳри Истаравшан - 90 кг-мӣ гандум ва ҷав, 40 кг намак, 80 кг-мӣ сабӯс, 20 бандӣ бастаи каҳ ва беда; дар шаҳри Конибодом - 400 кг гандум, 200 кг-мӣ ҷав ва маккадона; дар ноҳияи Деваштич - 300 кг-мӣ гандум ва ҷав, 50 кг намак, 250 кг сабзӣ, 20 банд бастаи каҳ ва 15 банд бастаи беда; дар ноҳияи Ашт - 270 кг гандум, 880 кг маккадона, 185 кг намак ва 200 банд бастаи алаф. Марид ба қайд аст, ки дар минтақаҳои баландкӯҳ ва доманакӯҳҳои шаҳру ноҳияҳои Панҷакент, Истаравшан, Исфара, Конибодом, Деваштич, Ашт, Шаҳристон, Ҷ.Расулов, инчунин дар минтақаҳои болооб ва соҳилҳои обанбори «Баҳри Тоҷик» давоми як моҳ, ҳамагӣ 11 маротиба амалиёти «Ҳифзи ҳайвонот ва парандагони ваҳшӣ» ташкил ва гузаронида шуд.

28 Январь 2026

Дар муассисаи таълимии шаҳри Гулистон оид ба ташвиқу тарғиби нуқтаҳои асосии Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон вохӯрӣ баргузор гардид

Подробности статьи: Автор; Категория Новости

Бо мақсади иҷрои нақшаи корӣ ва супориши протоколии Кумитаи ҳифзи муҳити зисти назди Ҳукумати Ҷумҳурии Тоҷикистон аз тарафи Сарраёсати ҳифзи муҳити зист дар вилояти Суғд ба зерсохторҳо дар шаҳру ноҳияҳо доир ба омӯзиши матн ва ташвиқу тарғиби нуқтаҳои асосии Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки ба Маҷлиси Олии мамлакат санаи 16 декабри соли 2025 баён гардид,ҷиҳати гузаронидани вохӯриҳо дар муассисаҳои таълимии соҳаи маориф ва дигар муассисаю ташкилоти ҳудуди маҳал, аз ҷумла бо ҷалби намояндагони КИ ҲХДТ, устодон, омӯзгорону коршиносон барқияи фаврӣ ирсол гардид. Дар ҳамкорӣ бо шуъбаи маорифи шаҳр аз ҷониби кормандони бахши ҳифзи муҳити зист дар шаҳри Гулистон вохӯрӣ бо хонандагони муассисаи таҳсилоти миёнаи умумии № 1 ташкил ва гузаронида шуд. Дар рафти вохӯрӣ ба иштирокдорон оид ба нуқтаҳои асосии Паёми навбатии Пешвои миллат, ташаббусҳои Тоҷикистон ва қабули қатъномаи Маҷмаи Умумии Созмони Милали Муттаҳид доир ба «Ҳифзи пиряхҳо ва криосфера, бахусус, дар минтақаҳои кӯҳӣ» ва дар бораи дигар масъалаҳои вобаста ба баланд бардоштани масъулияти шаҳрвандӣ суханронӣ карда шуд.

26 Январь 2026

Маъракаи ниҳолшинонӣ дар шаҳру ноҳияҳои вилояти Суғд

Подробности статьи: Автор; Категория Новости

Бо мақсади татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» ва таъмини иҷрои нақшаи амали соли 2026 дар шаҳру ноҳияҳои вилоят ҳар ҳафта, вобаста аз обу ҳаво чорабиниҳои шинонидани ниҳолҳои намуди ороишии ҳамешасабз гуаронида шуда истодааст. Дар шаҳри Гулистон ҳангоми ду маротиба гузаронидани аксияи ниҳолшинонӣ дар ҳудуди боғи назди кӯчаи ба номи А.Ҷомӣ, дар назди дидбонгоҳи Бозрасии давлатии автомобилӣ ва гардиши минтақаи истироҳатии шаҳр 510 бех ниҳолҳои намуди санавбар ва 200 бех намуди ардач бо иштироки раиси шаҳр шинонида шудааст. Ҳамзамон, дар даромадгоҳи ҷамоати шаҳраки Адрасмони шаҳри Гулистон бо иштироки Раиси вилояти Суғд, раиси шаҳр ва сокинони ҷамоати шаҳрак 55 бех ниҳоли дарахтони ҳамешасабзи ороишии санавбар шинонида шуд. Дар шаҳри Исфара чорабинии ниҳолшинонӣ бо иштироки 350 нафар шаҳрвандон ба амал омада, дар рафти он 2000 бех ниҳолҳои дарахтони ҳамешасабзи ороишии санавбар шинонида шуд ва баргузории чунин чорабинӣ бо нинонидани ниҳолҳои дарахтони ҳамешасабз дар қадди шоҳроҳи Душанбе – Хуҷанд – Чаноқ дар ноҳияи Шаҳристон низ амалӣ гардидааст. Маъракаи ниҳолшинонӣ дар миқёси вилояти Суғд идома ёфта тибқи нақшаи пешбинигардидаи мақомоти ҳифзи муҳити зист то охири моҳи январ маълумоти ҳамаи ниҳолҳои давоми моҳ шинонидашуда ҷамъбаст гардида, минбаъд оғоз аз моҳи феврал шаҳру ноҳияҳо оид ба рафти иҷрои нақшаи ниҳолшинонии соли 2026 дар доираи «Барномаи давлатии кабудизоркунии Ҷумҳурии Тоҷикистон барои давраи то соли 2040» ҳар 10 рӯз ба сарраёсат маълумоти хаттӣ пешниҳод менамоянд.

Дар ноҳияҳои Шаҳристон ва Ҷ.Расулов амалиёти «Ҳифзи ҳайвоноту парандагони ваҳшӣ» гузаронида шуд

Подробности статьи: Автор; Категория Новости

Бо тағйир ёфтани обу ҳаво, паст фаромадани ҳарорат ва боришоти барф масъалаи беталаф баромадани ҳайвоноти ваҳшӣ ва парандагон аз сармои фасли зимистон ба миён омада, гузаронидани амалиёти «Ҳифзи ҳайвоноту парандагони ваҳшӣ» идома дода шуд. Бо иқдом ва иштироки нозирони Сарраёсати ҳифзи муҳити зист дар вилояти Суғд ва бахши ҳифзи муҳити зист дар ноҳияи Шаҳристон дар якҷоягӣ бо кормандони Муассисаи давлатии хоҷагии ҷангали ноҳия дар ҳудуди мавзеъи «Хуррамдара» ва «Дараи сабз» корҳои биотехникӣ ба амал омад. Бо мақсади беҳтар намудани вазъи сукунати олами ҳайвоноти ваҳшӣ дар сармои фасли зимистон, ҳангоми баргузории амалиёт минтақаҳо ва маконҳои зисти ҳайвоноти ваҳшӣ бо хӯроки иловагӣ ба миқдори резаи гандум ва ҷав – 250 кг-мӣ, маккадона ва намак - 50 кг-мӣ, сабзӣ - 150 кг, карам ва картошка - 500 кг-мӣ, 15 ададӣ бастаи каҳ ва беда таъмин карда шудаанд. Ҳамчунин дар ноҳияи Ҷ.Расулов низ кормандони бахши ҳифзи муҳити зист якҷоя бо намояндагони Ҷамъияти шикорчиён ва моҳидорон дар минтақаҳои кӯҳии ноҳия корҳои биотехникиро гузарониданд. Дар ҷойҳои сукунати намудҳои гуногуни ҳайвоноти ваҳшӣ ва парандагон ҳаҷми таъминот бо хӯроки иловагӣ 200 кг гандум, 100 кг сабӯс ва 16 адад бастаи алафро ташкил намуд. Дар баробари ин бо мақсади пешгирии шикор ва сайди ғайриқонунии моҳӣ аз ҷониби нозирони мақомоти ҳифзи муҳити зист дар ноҳияи Ҷ.Расулов, дар минтақаҳои соҳили дарёи Сир амалиёти назоратӣ гузаронида шуда, дар рафти он байни шикорчиёну моҳидорони ҳаваскор доир ба қоидаҳои амалкунанда ва талаботи қонунгузорӣ дар самти ҳифзи олами набототу ҳайвонот корҳои фаҳмонидадиҳӣ амалӣ гардид.

Дар як қатор муассисаҳои томактабии шаҳру ноҳияҳои вилояти Суғд дарсҳои экологӣ оғоз гардид

Подробности статьи: Автор; Категория Новости

Иқдоми мазкур аз ҷониби Сарраёсати ҳифзи муҳити зист дар вилояти Суғд дар доираи татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021–2025» пешбинӣ ва амалӣ гардида, ҳадафи баланд бардоштани сатҳи маърифати экологӣ ва ташаккули фарҳанги муносибати масъулона ба табиат дар ҷомеаро дошт. Дар ҳамбастагӣ бо Ташкилоти ҷамъиятии «Гуруҳи ҷавонон оид ба ҳифзи муҳити атроф» ва Раёсати маорифи вилоят дар 5 муассисаҳои томактабии шаҳру ноҳияҳои Хуҷанд, Б.Ғафуров, Истиқлол, Бӯстон ва Гулистон, ки дар доираи лоиҳа ҳамчун пилотӣ интихоб гардидаанд, машғулиятҳои нави экологӣ ба таври озмоишӣ роҳандозӣ карда шуд. Барои гузаронидани дарсҳои экологии мазкур дар ҳамкорӣ бо методистон ва мутахассисони Раёсати маорифи вилоят махсусан як дастурамал - «Роҳнамо оид ба тарбияи экологӣ дар муассисаҳои томактабӣ» давоми соли 2025 таҳия гардид, ки минбаъд ҷиҳати шавқовар, дастрас ва бо тарзи муосир ташкил намудани машғулиятҳо ба мураббиёни кӯдакистонҳо кӯмак мерасонад.

21 Январь 2026

Идомаи корҳои биотехникӣ дар доираи амалиёти «Ҳифзи ҳайвонот ва парандагони ваҳшӣ» дар шаҳри Панҷакент

Подробности статьи: Автор; Категория Новости

Дар шаҳри Панҷакент аз тарафи шуъбаи ҳифзи муҳити зист дар ҳамбастагӣ бо Муассисаи давлатии хоҷагии ҷангал дар мавзеъи «Чиларча»-и ҷамоати деҳоти Саразм ва мавзеъи «Парваришгоҳи шаҳри Панҷакент» корҳои биотехникӣ гузаронида шуд. Бо мақсади таъмини олами ҳайвоноту парандагони ваҳшӣ бо хӯроки иловагӣ 300 кг гандум, 350 кг ҷав, 100 кг оқшоқ, 200 кг маккадона, 350 кг хӯроки омехта (комбикорм), 150 кг намак ва 90 кг сангнамак, 80 халта сабӯс, 50 ададӣ бастаи каҳ ва алаф харидорӣ гардида, дар талу теппаҳо ва доманакӯҳҳои мавзеъҳои мазкур, ки минтақаи сукунати ҳайвоноти ваҳшӣ ва намуди бисёри парандаҳо, аз ҷумла кабк ба ҳисоб меравад пошида шуд. Тибқи маълумоти мутахассисону коршиносон то айни ҳол талафоти ҳайвоноту парандагони ваҳшӣ дар ҳолати сард омадани обу ҳавои фасли зимистон ба қайд гирифта нашудааст.

«Паём – кафили зиндагии шоистаи мардум» - ҳамоиши омӯзишӣ дар Сарраёсати ҳифзи муҳити зист дар вилояти Суғд

Подробности статьи: Автор; Категория Новости

Бо мақсади шарҳу тавзеҳи нуқтаҳои асосии Паёми навбатии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва расонидани муҳтавои он ба кормандони Сарраёсати ҳифзи муҳити зист дар вилояти Суғд, инчунин қатъномаи Маҷмаи Умумии Созмони Милали Муттаҳид доир ба «Ҳифзи пиряхҳо ва криосфера, бахусус дар минтақаҳои кӯҳӣ» дар маҷлисгоҳи сарраёсат ҳамоиши омӯзишӣ баргузор гардид. Дар ҳамоиши омӯзишие, ки таҳти унвони «Паём – кафили зиндагии шоистаи мардум» ба амал омад, мудири шуъбаи омори Кумитаи иҷроияи марказии Ҳизби халқии демократии Тоҷикистон Нурзод Розиқ, муовини раиси Кумитаи иҷроияи Ҳизби халқии демократии Тоҷикистон дар вилояти Суғд Салимов Ф., намояндаи кумиҷроия дар вилоят Бобоева З. ва дотсент, номзади илмҳои география, сармутухассиси шуъбаи идоракунии сифати таҳсилоти Муассисаи давлатии таълимии «Донишгоҳи давлатии Хуҷанд ба номи академик Б.Ғафуров» Турдиев Т. иштирок ва суханронӣ карданд. Ба чорабинии мазкур муовини сардори сарраёсат ҳусни ифтитоҳ бахшида, зимни суханронии худ масъалаҳои сарҳадӣ, ташаббусҳои Тоҷикистону қабули қатъномаҳо ва дигар рӯйдодҳои таърихии дар Паёми навбатӣ қайдгардидаро таъкид намуд.

16 Январь 2026

Тадбирҳо баҳри пешгирии ифлосшавии муҳити зист дар шаҳри Конибодом

Подробности статьи: Автор; Категория Новости

Баҳри вусъат бахшидан ба корҳои ободониву кабудизоркунӣ ва дар доираи нақшаи чорабиниҳои омодагӣ барои сазовор пешвоз гирифтани ҷашни 35-солагии Истиқлоли давлатии Ҷумҳурии Тоҷикистон бо ташаббуси бахши ҳифзи муҳити зист дар шаҳри Конибодом вохӯрии муовини раиси шаҳр, мудири бахши ҳифзи муҳити зист ва сардори КДФ «Хаҷагии манзилию коммуналӣ» бо раисони Кумитаи маҳаллаҳои шаҳр дар толори хоҷагии манзилию коммуналӣ баргузор гардид. Вохӯрии мазкур бо мақсади пешгирии ифлосшавии муҳити зист ва беҳтар намудани ҳолати экологӣ ба амал омада, ҳамчунин дар рафти чорабинӣ масъалаҳои вобаста ба тартибу танзим даровардани ҷойгиронии ғайрирасмии партовҳои истеъмолии аҳолӣ ва фаъолона гузаронидани маъракаи ниҳолшинонӣ муҳокима карда шуд. Минбаъд, тибқи нақшаи пешбинигардида иқдоми мазкур идома ёфта, барои тоза нигоҳ доштани муҳити зист ва атроф тадбирҳои мушаххас андешида мешавад.

Амалиёти «Ҳифзи ҳайвоноту парандагони ваҳшӣ» дар минтақаҳои баландкӯҳ ва доманакӯҳҳои вилояти Суғд

Подробности статьи: Автор; Категория Новости

Тибқи нақшаи пешбинигардидаи Сарраёсати ҳифзи муҳити зист дар вилояти Суғд дар минтақаҳои баландкӯҳ ва доманакӯҳҳои шаҳру ноҳияҳои вилоят амалиёти «Ҳифзи ҳайвоноту парандагони ваҳшӣ» ташкил ва гузаронида шуд. Бо мақсади беталаф баромадани ҳайвоноти ваҳшӣ ва парандагон аз сармои зимистон мутахассинони шуъбаи назорати давлатии истифода ва ҳифзи олами набот, ҳайвонот ва захираҳои моҳии сарраёсат дар минтақаи Лаккони шаҳри Исфара ва минтақаи Шӯркӯли болооби обанбори «Баҳри Тоҷик» корҳои биотехникӣ гузаронида, 500 кг-мӣ резаи гандум, резаи ҷав, намак ва сабӯс, 50 кг резаи ҷуворимакка, 50 бандӣ бастаи каҳ ва беда, дар маҷмуъ таъмини ҳаҷми хӯроки иловагӣ 4050 кг-ро ташкил намуд. Ҳамчунин, аз тарафи бахши ҳифзи муҳити зист дар шаҳри Истаравшан дар минтақаи Навободи ҷамоати деҳоти Нофароҷи шаҳр, ки минтақаи сардтарин ва сербориштарин ба ҳисоб меравад, корҳои биотехникӣ гузаронида шуд. Бояд қайд кард, ки зимни мушоҳидаҳои бисёрсола дар доманакӯҳ ва талу теппаҳои минтақаи мазкур, дар ҳаргуна вақт намудҳои ҳайвонот ва парандагони нодир, аз ҷумла рӯбоҳ, хирс, шоҳин, ҷайра, тазарви тоҷикӣ, бургут, каргас, оху ва дигар намудҳои олами ҳайвонот, инчунин дохили Китоби сурхи Ҷумҳурии Тоҷикистон дида мешаванд. Дар рафти корҳои биотехникӣ 50 кг-мӣ гандум ва ҷав, 20 кг намак, 30 кг-мӣ сабӯс ва каштан, 10 бандӣ бастаи каҳ ва беда, ҳамагӣ 580 кг хӯроки иловагӣ дар ин минтақа пошида шуд.

12 Январь 2026

Ҷаласаи Комиссияи байниидоравии давлатӣ оид ба маърифати экологии аҳолӣ дар вилояти Суғд

Подробности статьи: Автор; Категория Новости

Дар айни ҳол муҳлати татбиқи «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025» ба охир расида, бо мақсади натиҷабардорӣ аз фаъолияти Комиссияи байниидоравии давлатӣ оид ба маърифати экологии аҳолӣ дар вилоят ва чунин комиссияҳо дар шаҳру ноҳияҳо, ҷаласаи ҷаъмбастӣ дар толори калони Сарраёсати ҳифзи муҳити зист дар вилоят гузаронида шуд. Ҷаласаи мазкур таҳти раёсати муовини Раиси вилояти Суғд, раиси комиссия Ф.Қосимӣ ва бо иштироки сардори Маркази ахбори экологӣ, тарғибот ва барномасозии компютерии Кумитаи ҳифзи муҳити зисти назди Ҳукумати Ҷумҳурии Тоҷикистон Тиллоӣ Г., сардори Сарраёсати ҳифзи муҳити зист дар вилоят Холзода С.Х., сохторҳои аъзоёни комиссияи вилоятӣ, муовинони раисони шаҳру ноҳияҳо - раисони комиссияҳои маҳаллӣ, сардорони шуъбаҳо ва мудирони бахшҳои ҳифзи муҳити зист дар шаҳру ноҳияҳо баргузор гардид. Дар баробари бахшидани ҳусни ифтитоҳ ба ҷаласа муовини Раиси вилоят иштирокдоронро бо рӯзнома шинос карда қайд намуд, ки тибқи Низомномаи Комиссияи байниидоравии давлатӣ оид ба маърифати экологии аҳолӣ дар вилоят, ки бо қарори Раиси вилояти Суғд аз 10 декабри соли 2021, №558 тасдиқ гардидааст, ҷаласаи комиссия дар асоси нақшаи кори ҳарсола тасдиқшаванда, бояд дар як сол ду маротиба гузаронида шавад ва мутобиқи талабот ҷаласаи мазкур дуюм маротиба дар соли 2025 барпо гардида истодааст.