Все статьи

25 Август 2021

Амалиёти “Ҳавои тоза” дар шаҳри Хуҷанд ва ноҳияи Бобоҷон Ғафуров

Подробности статьи: Автор; Категория Новости

Бо мақсади кам намудани ихроҷи моддаҳои зараровар ба ҳавои атмосфера, тибқи нақшаи кории шуъбаи назорати давлатии истифода ва ҳифзи ҳавои атмосфераи Раёсат дар шаҳри Хуҷанд ва ноҳияи Бобоҷон Ғафуров амалиёти «Ҳавои тоза» гузаронида шуд. Рафти амалиёт 38 адад нақлиётҳои автомобилии тамғаашон гуногун аз санҷиши аналитикӣ гузаронида шуда, миқдори партови моддаҳои ифлоскунанда ба ҳавои атмосфера дар натиҷаи сӯхтани сӯзишворӣ (дизелӣ, бензин ва гази моеъ) муайян гардид. Нисбати ронандагони 8 адад воситаҳои нақлиёти автомобилие, ки меъёри стандартҳои давлатиро вайрон карда, партови моддаҳои ифлоскунандаро (гази СО) ба фазои атмосфера барзиёд ихроҷ кардаанд, протоколҳои ҳуқуқвайронкунии маъмурӣ тартиб дода шуда, барои чораандешӣ ба БДА-и шаҳру ноҳияҳои вилоят ирсол карда шуд.

Аксияҳои «Тозагии маҳал» ва «Тозагии соҳил» дар вилояти Суғд

Подробности статьи: Автор; Категория Новости

Дар доираи нақшаи чорабиниҳо оид ба омодагӣ ва таҷлили 30-солагии Истиқлолияти давлатии Ҷумҳурии Тоҷикистон дар миқёси шаҳру ноҳияҳои вилояти Суғд аксияҳои гуногуни экологии оммавӣ идома дорад. Бо иқдоми Раёсати ҳифзи муҳити зисти вилоят дар аксияҳои «Тозагии маҳал» ва «Тозагии соҳил», ки дар миқёси вилоят ташкил ва гузаронида шуд, беш аз 23 ҳазор нафар кормандони ҷомеаҳои меҳнатии корхонаҳо, ташкилоту муассиса, хоҷагиҳо ва шаҳрвандон фаъолона иштирок намуданд. Дар рафти аксияҳо корҳои тоза намудани ҷўйбор, заҳбуру заҳкаш - 25,3 км, тоза намудани қадди роҳҳо аз партовҳо - 53,7 км, таъмири роҳравҳо - 3 км, тоза намудани заҳбуру каналҳо - 300 м, сафед намудани дарахтон - 1236 бех, тоза намудани майдонҳо - 4 км амалӣ гардида, 126,4 метри мукааб партовҳо ба партовгоҳҳои расмӣ бароварда шуд. То баргузории ҷашни миллӣ баргузор гардидани аксияҳои экологӣ дар миқёси вилоят идома дорад.

21 Август 2021

Насби овезаи экологӣ дар шаҳри Истиқлол

Подробности статьи: Автор; Категория Новости

Бо мақсади сазовор истиқбол гирифтани чашни миллии 30-солагии Истиқлолияти давлатии Ҷумҳурии Тоҷикистон дар шаҳру ноҳияҳои вилояти Суғд насби овезаҳои экологӣ идома дорад. Аз ҷониби бахши ҳифзи муҳити зисти шаҳри Истиқлол дар яке аз кӯчаҳои марказии шаҳр – Маҳаллаи 1 баннери экологӣ бо навиштаҷоти тарғиботии сайёҳати экологӣ насб карда шуд. Мақсад аз насб намудани овезаҳои экологӣ баланд бардоштани маърифатнокии аҳолӣ доир ба муҳити зист ва тарғиби саёҳати экологӣ маҳсуб меёбад.

Баргузории вохӯрӣ ва аксияи экологӣ таҳти унвони "Ояндаи бидуни пластик!" дар шаҳри Истаравшан

Подробности статьи: Автор; Категория Новости

Тибқи нақшаи пешбинигардида, санаи 18 августи соли 2021 дар шаҳри Истаравшан аз тарафи Раёсати ҳифзи муҳити зисти вилояти Суғд якҷоя бо Ташкилоти ҷамъиятии "Сафӣ" дар доираи татбиқи лоиҳаи "Ҷаҳон бидуни маҳсулоти пластикӣ", ки аз ҷониби ташкилоти байналхалқии Юнисеф дастгирӣ карда мешавад, вохӯрии иттилоотӣ ва аксияи "Ояндаи бидуни пластикӣ" баргузор гардид. Дар он намояндагони сохторҳои МИҲД-и шаҳри Истаравшан, мақомоти ҳифзи муҳити зист, ҷамоати шаҳраку деҳот, раисони кумитаи маҳаллаҳо, соҳибкорон, сокинони фаъоли шаҳр, бахши ҷавонони шаҳр, волонтёрон ва аъзои ташкилоти ҷамъиятии "Пайравони Пешвои миллат" иштирок доштанд. Намояндаи Раёсати ҳифзи муҳити зисти вилоят баромад карда, доир ба зарари маҳсулоти пластикӣ маълумоти муфассал дод. Зикр гардид, ки татбиқи лоиҳаи мазкур бо мақсади паст намудани таъсири зарари маводи пластикӣ ба саломатии инсон ва умуман ба ҷомеа роҳандозӣ гардидааст.

19 Август 2021

Боздошти қуруқшиканон бо шасти барқӣ (электроудочка)

Подробности статьи: Автор; Категория Новости

Нозирони шуъбаи назорати давлатии истифода ва ҳифзи олами наботот, ҳайвонот ва захираҳои моҳии Раёсат дар натиҷаи гузаронидани амалиётҳои фаврӣ дар ҳавзаи Сирдарё, минтақаи Палос ду нафар қуруқшиканонро ҳангоми сайди ғайриқонунии моҳӣ бо шасти барқӣ боздошт намуданд. Аз қуруқшиканон қаиқ бо муҳаррикаш, шастибарқӣва 20 адад моҳиҳои гуногун мусодира ва муваққатан ба анбори Раёсати ҳифзи муҳити зисти вилояти Сугд супорида шуд. Нисбати қуруқшиканон маводҳои зарурӣ тартиб дода шуда, барои андешидани чораҳои маъмурӣ ба прокуратураи ноҳияи Б.Ғафуров фиристода шуд. Гуфтан ҷоиз аст, ки шасти барқӣ ба гурӯҳи аслиҳаи маҳви оммавӣ дохил шуда, боиси кохиш ёфтани захираи моҳӣ мегардад. Фардҳои наслдиҳандаи ба майдони шасти барқӣ дучоршуда аз афзоиш монда, ба безурётии олами организмҳои обӣ мусоидат менамояд.

18 Август 2021

Бартараф намудани партовҳои бесоҳиб ва гузаронидани аксияи “Тозагии роҳ” дар шаҳри Истаравшан

Подробности статьи: Автор; Категория Новости

Дар доираи нақшаи чорабиниҳо бахшида ба 30-солагии Истиқлолияти давлатии Ҷумҳурии Тоҷикистон, бо мақсади пешгирии ифлосшавии муҳити зист ва бартараф намудани партовҳои бесоҳиб, аз ҷониби нозирони бахши ҳифзи муҳити зисти шаҳри Истаравшан амалиётҳои шабонарӯзӣ гузаронида шуда истодааст. Ҳангоми гузаронидани чунин амалиёт дар қадди роҳи Истаравшан – Ниҷонӣ партовҳои бесоҳиб ошкор гардида, аз дохили партов ҳуҷҷатҳо ба номи шаҳрванд Исломов Обид - сокини деҳаи Сари Мазори ҷамоати деҳоти Гули Сурхи шаҳри Истаравшан дарёфт гардид.Нисбати Исломов О. протоколи ҳуқуқвайронкунии маъмурӣ тартиб дода, ҷарима ба маблағи 600 сомонӣ баста шуд. Ғайр аз ин бо пешниҳоди бахши ҳифзи муҳити зист аз тарафи шаҳрванд Исломов О. ҳамаи партовҳои партофташуда бартараф карда шуд. Ҳамчунин дар доираи нақшаи чорабиниҳо дар шаҳр аксияи «Тозагии роҳ» баргузор гардида, дар натиҷа 7 км ду тарафи қадди роҳи кӯчаҳои протоколӣ, аз он ҷумла ҷӯйборҳо аз партовҳо тоза карда шуд. Дар баробари ин корҳои сафед кардани танаи дарахтон ва нарм намудани замини он гузаронида шуд. Дар маҷмӯъ, дар рафти аксия беш аз 250 нафар иштирок дошта, 12 метри мукааб партовҳо ба партовгоҳ бароварда шуд.

Амалиётҳои фаврӣ дар обанбори Баҳри Тоҷик

Подробности статьи: Автор; Категория Новости

Нозирони шуъбаи назорати давлатии истифода ва ҳифзи олами наботот, ҳайвонот ва захираҳои моҳии Раёсат ҳангоми гузаронидани амалиётҳои фаврӣ дар обанбори Баҳри Тоҷик минтақаи Ташкентский ду ҳолати сайди ғайриқонунии моҳиро ошкор намуданд. Қонуншиканӣ аз тарафи сокинони ноҳияи Б.Ғафуров ҷамоати деҳоти Исфисор ва шаҳри Гулистон кӯчаи И.Сомонӣ 12/2 содир карда шуда, дар маҷмӯъ 73 сар моҳӣ ва 45 адад тӯри моҳидорӣ мусодира гардид. Нисбати онҳо протоколҳои ҳуқуқвайронкунии маъмурӣ бо моддаи 208 қисми 1 тартиб дода шуда, барои баррасӣ ба суди ш.Гулистон ва ноҳияи Б.Ғафуров фиристода шуд.

Шиносоии хонандагон аз корхонаи коркарди партов дар шаҳри Конибодом

Подробности статьи: Автор; Категория Новости

Бо мақсади шиносоӣ пайдо намудан ва бо ин васила баланд бардоштани маърифати экологӣ бо иқдоми бахшҳои ҳифзи муҳити зисти шаҳрҳои Исфара ва Конибодом дар ҳамкорӣ бо ташкилоти ҷамъиятии «Гӯшаи амрикоӣ» дар шаҳри Исфара хонандагони фаъоли муассисаҳои таълимии миёнаи умумӣ аз корхонаи коркарди партовҳои шаҳри Конибодом ҶДММ «Таҷ Эко» дидан намуданд. Муҳандиси корхона хонандагонро аз рафти фаъолияти корхона, тарзи ба навъҳо ҷудо намудани партовҳо шинос намуда, ин иқдомро барои беҳдошти муҳити зист ва кам шудани партовҳо маънидод намуд. Дар навбати худ хонандагон ба саволҳои худ ҷавобҳои саҳеҳ гирифтанд.

14 Август 2021

Семинари омӯзишӣ оид ба таҳкими механизмҳои татбиқи муқаррароти Конвенсияи Орхус

Подробности статьи: Автор; Категория Новости

Санаҳои 10 - 11 августи соли 2021 дар толори меҳмонхонаи Сиренаи шаҳри Душанбе семинари омӯзишӣ оид ба таҳкими механизмҳои татбиқи муқаррароти Конвенсияи Орхус баргузор гардид. Қайд кардан ба маврид аст, ки дар кори семинари мазкур намояндагони ҳамаи панҷ Марказҳои Орхус аз шаҳрҳои Душанбе, Хуҷанд, Бохтар, Хорог ва Ғарм, инчунин сармутахассиси Раёсати ҳифзи муҳити зисти вилояти Суғд ва сармуҳаррири рўзномаи вилоятии «Согдийская правда» ҳамчун шарики доимии Марказҳои Орхус дар шаҳри Хуҷанд ва дигар намояндагони шарикони рушд иштирок дошта, чорабинӣ бо дастгирии ташкилоти Дафтари барномаи САҲА дар шаҳри Душанбе амалӣ гардид. Дар рафти семинар инъикоси мақсад ва вазифаҳои он, лексияҳо дар бораи қоидаҳо ва принсипҳои Конвенсияи Орхус, ҳуқуқ ба иттилооти экологӣ ва механизмҳои татбиқи он дар қонунгузории Ҷумҳурии Тоҷикистон, шаклҳои асосии иштироки аҳолӣ дар қабули қарорҳои назарраси экологӣ, асосҳо барои ҷустуҷӯи адолати судӣ тибқи Конвенсияи Орхус, тартиби роҳҳои муҳофизати ғайрисудӣ (маъмурӣ) ва хусусиятҳои усули ҳимояи судӣ пешкаши иштирокдорон гардид. Дар қисми муҳокимаи маърўзаҳо саволу ҷавоб ба амал омада, дуюм маротиба бо саволнома корбарӣ карда шуд.

Пешгирии ифлосшавии ҳаво ва амалиёти “Ҳавои тоза” дар шаҳри Панҷакент

Подробности статьи: Автор; Категория Новости

Бо мақсади кам намудани ихроҷи моддаҳои зараровар ба ҳавои атмосфера дар шаҳру ноҳияҳои вилояти Суғд мунтазам амалиёти «Ҳавои тоза» гузаронида мешавад. Тибқи нақшаи пешбинигардида аз тарафи мутахассисони бахши ҳифзи муҳити зисти шаҳри Панҷакент дар ҳамкорӣ бо кормандони шуъбачаи милитсияи экологӣ ва сайёҳии ВКД-и Ҷумҳурии Тоҷикистон дар минтақаи Зарафшон чунин амалиёт ҷиҳати муайян намудани миқдори партови моддаҳои ифлоскунанда ба ҳавои атмосфера аз нақлиёт дар натиҷаи сӯхтани сӯзишворӣ - дизелӣ, бензин ва гази моеъ дар шоҳроҳи Айнӣ – Панҷакент баргузор гардид. Дар рафти амалиёти мазкур, ҳамагӣ 20 адад нақлиёти автомобилии тамғааш гуногун аз санҷиши аналитикӣ гузаронида, нисбати ронандагони 3 адад воситаҳои нақлиёт, ки меъёри стандартҳои давлатиро вайрон карда, партови моддаҳои ифлоскунандаро (гази СО) ба ҳавои атмосфера барзиёд ихроҷ намудаанд, протоколҳои ҳуқуқвайронкунии маъмурӣ тартиб дода шуд ва барои чораандешӣ ба БДА-и шаҳр ирсол гардид.