Бо мақсади таъмини рафти иҷрои қарори Ҳукумати Ҷумҳурии Тоҷикистон аз 02.11.2012, №626 ва қарори Раиси вилояти Суғд аз 08.02.2013с. №31 «Дар бораи тартиби ошкор кардан ва баҳисоб гирифтани партовҳои бесоҳиб ва пешгирии ифлосшавии муҳити зист ва кам кардани ҳаҷми ҳосилшавии партовҳо» мақомоти ҳифзи муҳити зист мунтазам чораҳои заруриро андешида истодааст.Бо ин мақсад тибқи дастуру супориши бахши ҳифзи муҳити зисти ноҳияи Ҷаббор Расулов соҳибмулкони қитъаи замин ва ҷамоати деҳоти Гулхона бо ҷалби техника 2 нуқтаи партови бесоҳибро аз соҳили селроҳа бартараф намуда, беш аз 16 м3 партовҳо ба партовгоҳи расмӣ интиқол ва ҷойгир карда шуд. Чорабиниҳои пешгирии ифлосшавии муҳити атроф, беҳбудӣ бахшидан ба ҳолати экологӣ дар доираи нақшаи чорабиниҳо бахшида ба 30-солагии Истиқлолияти давлатии Ҷумҳурии Тоҷикистон дар дигар ҷамоати шаҳраку деҳот идома дорад.

 1 апрели соли 1906 Конвенсияи байналмилалӣ оид ба муҳофизати паррандаҳо ба имзо расид. Дар кишвари собиқ Шӯравӣ таҷлили «Рӯзи байналмилалии паррандаҳо» аз 1 апрели  соли 1927 ба ҳукми анъана даромада буд. Аз соли 1994 ин ҷашн дар аксар кишварҳо дар доираи барномаи ЮНЕСКО «Инсон ва биосфера» таҷлил мегардад. Хотиррасон бояд кард, ки парандаҳо яке аз қиркунандагони ҳашаротҳои зараровари кишоварзӣ маҳсуб меёбанд. Ҳар як фасл парандагони хоси худро дорад. Бо иваз шудани фасли сол парандаҳо низ макони зисти худро иваз мекунанд. Солҳои охир дар зери таъсири омилҳои гуногун, аз он ҷумла таъсири фаъолияти инсон, ба олами парандаҳо ба камшавии саршумор ва ҳатто зери хатари пурра маҳвшавӣ оварда расонида истодааст. Ба ҷуз  омили антропогенӣ, дигаргуншавии иқлим ва офатҳои табии низ ба экосистемаҳои олами ҳайвонот зараровар таъсир расонидаанд. Дар байни гуногунии биологӣ, олами парандагон мавқеи хоса доранд.

  Зимни сафари корӣ Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур ва раиси шаҳри Хуҷанд Шарифзода Фирдавс бо мақсади шиносоӣ аз фаъолияти Корхонаи давлатии коммуналии «Кабудизоркунӣ ва гулпарварӣ»-и шаҳри Хуҷанд дидан намуданд. Дар Муассисаи мазкур, ки ҳудуди он беш аз 8 гектарро ташкил медиҳад, як қатор корҳо ба иҷро расонида шуданд. Дар майдонҳои ҳудуди коргоҳ ниҳолҳои ҳамешасабз ва ороишӣ шинонида шуда, парвариш ва нигоҳубин карда мешаванд. 4 адад гармхонаҳо бо парвариши гулҳои мавсимӣ фаъол мебошанд. Ҳамзамон дар ин муассиса бунёди боз гармхонаҳои нав, мағозаи фурўши гулу кўчат ва нуқтаи маслиҳатдиҳӣ низ ба нақша гирифта шудааст.

   Баҳри таъмини иҷрои нақшаи чорабиниҳо бахшида ба 30-солагии Истиқлолияти давлатӣ, дар ҷараёни сафари корӣ Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Б.А. ва сардори Раёсати ҳифзи муҳити зисти вилояти Суғд Ҳакимзода А.Қ. аз ҷараёни корҳои сохтмони бинои маъмурии бахши ҳифзи муҳити зисти шаҳри Бӯстон дидан намуданд. Бинои мазкур аз се ошёна, 5 ҳуҷраи корӣ, китобхона, толори маҷлисгоҳ ва меҳмонхона иборат аст. Айни ҳол дар гирду атрофи бино корҳои ободонӣ ва васлу насби таҷҳизотҳо идома дорад. Раиси Кумита Шерализода Б.А. ба масъулон ва сохтмончиён барои босифат анҷом додани корҳои боқимонда дастуру супоришҳо доданд.