Санаи 30 майи соли равон бахшида ба санаи 5 июн – Рўзи байналмилалии муҳити зист аз ҷониби сардори Раёсати ҳифзи муҳити зисти вилояти Суғд як қатор собиқадорони меҳнат, ки солҳои тўлони дар соҳаи ҳифзи муҳити зист фаъолият кардаанд ва дар айни замон дар нафақа мебошанд аёдат карда шуд. Аз ҷумла, собиқадоронро дар шаҳру ноҳияҳои Хуҷанд, Конибодом, Б.Ғафуров ва Ҷ.Расулов хабар гирифта, ба онҳо кўмаки моддию молиявӣ расонида шуд. Чораҷўии мазкур дар асоси дастуру супоришҳои Раиси Кумитаи ҳифзи муҳити зисти назди Ҳукумати Ҷумҳурии Точикистон ва баҳри иҷрои бандҳои нақшаи чорабиниҳо бахшида ба баргузор намудани Рўзи байналмилалии муҳити зист амалӣ гардид.

 Бо ташаббуси Раёсати ҳифзи муҳити зисти вилояти Суғд санаи 30 майи соли ҷорӣ бахшида ба Рўзи байналмилалии муҳити зист як қатор чорабиниҳо баргузор гардид. Яке аз онҳо ин аксияи тақдим кардани маводи пешгирикунанда аз касалии коронавирус COVID– 19 ба кормандони корхонаи ободонии шаҳри Хуҷанд, ки бо рўбу чини кўчаю хиёбонҳо машғул мебошанд. Субҳи рўзи шанбе аз ҷониби кормандони раёсат, ки барои онҳо  футболка ва кепка бо навиштачот пешаки омода гардида буд, дар кўчаҳои шаҳрҳои Хуҷанд ва Гулистон ба занҳо – рўбандаи корхонаи хоҷагии манзилию коммуналӣ, кормандони хадамоти партовкашонӣ ва инчунин шаҳрвандони эҳтиёҷманд маводи пешгирӣ, аз он ҷумла ниқоб, дастпўшаки резинӣ, маводи антисептикӣ ва варақаи иттилоотӣ оид ба қоидаҳои бехатарӣ тақдим карда шуд. Дар маҷму, дар рафти аксия 1,5 ҳазор чунин мавод дастрас гардид.

Бо мақсади иҷрои дастуру супоришҳои Асосгузори сулҳу ваьдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва банди 9-и Нақшаи чорабиниҳо барои баргузор намудани Рўзи байналмиллалии муҳити зист оид ба пешгирӣ ва мубориза алайҳи сироятёбӣ аз бемории коронавируси «COVID-19» аз ҷониби мутахассисони бахши ҳифзи муҳити зисти  шаҳри Конибодом дар якҷояги бо кормандони Маркази назоратӣ давлатии санитарию эпидемиологӣ санаи 26-27 майи соли 2020 дар хиёбонҳои марказии шаҳр, гулгаштҳо ва боғи фаоҳангию фароғатӣ, нуқтаҳои муваққатан ҷамъоварии партовҳо бо истифода аз маҳлулҳои кимиёвӣ корҳои безараргардонӣ гузаронида шуд.

Аз тарафи бахши ҳифзи муҳити зисти шаҳри Исфара баҳри дар амал татбиқ намудани фармоиши Раиси Кумитаи ҳифзи муҳити зисти назди Ҳукумати Ҷумҳурии Тоҷикистон ва сардори Раёсати ҳифзи муҳити зисти вилояти Суғд оид ба пурзўр намудани чораҳои зиддиэпидемикӣ ва пешгирии паҳншавии сирояти коронавируси нави COVID-19 зарурӣ андешида шуда истодааст. Кормандони бахш якҷоя бо кормандони соҳаи тандурустӣ, аз он чумла Маркази назорати давлатии санитарию эпидемиологӣ корҳои тамизгардонии роҳи марказӣ, кўчаҳо, ҷойҳои ҷамъиятӣ ва иншоотҳои иҷтимоию хизматрасонӣ, ҳамчунин нуқтаҳои муваққатии партовҷамъкуниро гузарониданд. Чунин чораҷўиҳо дар ҳамаи ҷамоати шаҳраку деҳот низ гузаронида шуда истодааст.