Тибқи дастуру супоришҳои қарори мушовараи Кумитаи ҳифзи муҳити зисти назди Ҳукумати Ҷумҳурии Тоҷикистон ва бахшида ба истиқболи 30-солагии Истиқлолияти давлатии Ҷумҳурии Тоҷикистон, дар ҷамоати деҳоти Меҳробод ва Ориёни ноҳияи Ашт аксияҳои экологии «Тозагии соҳил», «Тозагии маҳал» ва ҳамчунин маъракаи ниҳолшинонӣ баргузор гардид. Ҳамагӣ беш аз 1,6 ҳазор нафар намояндагон ва аҳолии ҷамоати деҳот дар корҳои кабудизоркунию ободонӣ иштирок намуданд. Дар рафти аксияи «Тозагии соҳил» 4 километр соҳили сойи Шайдон ва ҷӯйбор аз партовҳои истеъмолӣ тоза гардида, дар рафти аксияи «Тозагии маҳал» бошад 4,5 километр роҳҳои асосию протоколӣ рӯбучин карда, дар маҷмуъ, аз тарафи кормандони хадамоти хоҷагии манзилию коммуналӣ 6,7 метри мукааб партовҳо ба партовгоҳ бароварда шуд. Ҳамзамон, дар ҳудуди ҷамоати деҳот иштирокчиёни маърака 1335 бех ниҳоли дарахтони ороишии ҳамешасабз ва мевадиҳанда шинониданд.

 Бо мақсади рушди соҳаи моҳипарварӣ дар ҷамоати деҳоти Гулхонаи ноҳияи Ҷ.Расулов «Корпоратсияи моҳии Тоҷик» ташкил гардида истодааст, ки мувофиқи нақшаи пешбинигардида бо парвариши гулмоҳӣ машғул мешавад. Дар айни замон корҳои сохтмони хоҷагии моҳипарварӣ бо суръат идома ёфта, бо истифода аз техникаи пуриқтидор кофтани 25 ҳавзи моҳипарварӣ амалӣ шуда истодааст. Майдони умумии хоҷагии мазкур дар 3 гектар ҷойгир мешавад ва тибқи нақша дар қисми аввал 100 ҳазор моҳичаҳои гулмоҳӣ парвариш меёбанд. Аллакай, пас аз соли якум хоҷагӣ ният дорад, ки 100 тонна гушти тайёри гулмоҳиро пешкаши харидорон намояд. Намояндагони Раёсати ҳифзи муҳити зисти вилояти Суғд ва «Корпоратсияи моҳии Тоҷик»-и Ҷумҳурӣ аз рафти корҳои сохтмонӣ дидан намудан ва як қатор маслиҳатҳои муфид пешниҳод карда шуд.

 Ҳамасола Академияи  миллии илмҳои Ҷумҳурии Тоҷикистон, Институти зоология ва паразитологияи ба номи Е.Н.Павловский дар якҷоягӣ бо Иттиҳодияи ҳифзи табиат ва гуногунии биологии Тоҷикистон яке аз парандаҳои нодири Тоҷикистонро бо мақсади барқарор ва афзун намудани саршумори он парандаи сол интихоб менамоянд. Имсол шоҳуқоб парандаи соли 2021 интихоб гардид. Шоҳуқоб яке аз калонтарин намуди парандагони оилаи лочинҳо ба шумор меравад. Ин парандаи соҳибчанголи пурқувват ва чолок дар баландиҳои зиёд ва гӯшаҳои дастнорас вомехӯрад. Дар ҳудуди Тоҷикистон шоҳуқоб дар минтақаҳои кӯҳӣ ва баландкӯҳ вомехӯрад. Дарозии бадани шоҳуқоб беш аз 95 см ва дарозии болҳои он то 2,5 м-ро ташкил медиҳад. Вазни ҷинсҳои модина то ба 7 кг ва ҷинсҳои нарина то ба 4,6 кг мерасад.

Бо истифода аз обу ҳавои мусоид ва бо мақсади гузаронидани корҳои ободонӣ баҳри сазовор пешвоз гирифтани ҷашни 30-солагии Истиқлолияти давлатии Ҷумҳурии Тоҷикистон дар шаҳри Истаравшан шанбегии умумишаҳрӣ баргузор гардид. Дар рафти маърака 510 нафар кормандони ҷомеаи меҳнатии корхонаву ташкилот, муассисаҳои таълимӣ, аз он ҷумла Коллеҷи тиббӣ, Литсейи касбии техникии №14, Коллеҷи ҳунарҳои мардумӣ, беморхонаҳои марказию хусусӣ, Кумитаи маҳаллаҳо, ҷамоати шаҳраку деҳот ва соҳибкорон иштирок карда, 1,3 километр ҷўйбори обгузари ду тарафи хиёбони Исмоили Сомонӣ ва Истиқлоли шаҳр, майдони марказӣ, ҳудуд ва атрофи биноҳои маъмурии корхонаҳои шафати роҳи асосӣ тоза ва рўбучин гардидаанд.