Ҳангоми аз ҷониби нозирони Сарраёсати ҳифзи муҳити зист дар вилояти Суғд гузаронидани санҷиши фаъолияти моҳидории ҶСК «Таъминоти моҳӣ»-и шаҳри Гулистон муайян гардид, ки моҳидори ҷамъияти мазкур Мамадҷонов Мурод, сокини ҷамоати деҳоти Маҳрами шаҳри Конибодом, сайди моҳиро бо тўрҳои майдаи ба талабот номувофиқ гузаронида, дар натиҷа 244 сар моҳии ғайриченак сайд кардааст. Нисбати моҳидор Мамадҷонов М. маводи зарурӣ, аз ҷумла ҳисоби маблағи ба табиат расонидашуда, хулосаи ихтиологӣ ва дигар ҳуҷҷатҳо тартиб ёфта, тибқи талаботи қонунҳои амалкунанда барои чораандешӣ ба Суди шаҳри Конибодом ирсол мегардад. Ҳамзамон, ҳангоми гузаронидани амалиёти фаврии шабонарўзии назоратӣ дар обанбори Баҳри Тоҷик ва атрофи он, дар минтақаи Маҳрам ҳодисаи хариду фурўши 965 сар моҳии навсайдшуда ошкор гардид, ки ин моҳӣ низ ғайриченак буда, бидуни талабот сайд карда шудааст.

  Тибқи нақшаи корӣ нозирони шуъбаҳои сарраёсат назорати давлатиро дар самтҳои ҳифзи муҳити зист дар минтақаҳои гуногуни миқёси вилоят амалӣ менамоянд. Бо ин мақсад, ҳангоми гузаронидани амалиёти назоратӣ дар мавзеи партовгоҳи шаҳри Истиқлол 2 нафар сокини шаҳри Хуҷанд боздошт гардиданд, ки бо шикори ғайриқонунии парандаи хушхон, аз ҷумла саъба машғул буданд. Нисбати онҳо бо дастрасии моддаи 208, қ.1-и Кодекси ҳуқуқвайронкунии маъмурии Ҷумҳурии Тоҷикистон протоколҳо тартиб дода шуд.

 Бо  истифода аз обу ҳавои мусоид, бахшида ба  30-солагии Иҷлосияи XVI-уми Шӯрои Олии Ҷумҳурии Тоҷикистон ва ташрифи меҳмонони олиқадр ба вилояти Суғд, дар шаҳру  ноҳияҳои Хуҷанд, Гулистон, Истиқлол, Истаравшан, Исфара, Спитамен ва Ҷ.Расулов аксияҳои экологии «Тозагии маҳал», «Тозагии соҳил» ва «Тозагии шоҳроҳ» гузаронида шуд.  Аксияҳои мазкур асосан бо мақсади тоза намудани шоҳроҳи Душанбе – Хуҷанд – Чаноқ, кўчаҳои протоколӣ ва минтақаи шаҳрии соҳили дарёи Сир аз партовҳо баргузор гардида, дар рафти онҳо намояндагони муассисаҳои таълимӣ, ташкилоту идораҳо, нуқтаҳои савдо ва тиҷорат, шаҳрвандон ва сокинони ҷамоати шаҳраку деҳот, ҳамагӣ беш аз 2 ҳазор нафар фаъолона иштирок намуданд. Дар натиҷа 5,1 км ҷуйборҳои қадди роҳ, 3 км соҳилҳои обӣ ва зиёда аз 3 ҳазор метри мураббаъ ҳудуди маҳалҳои аҳолинишин аз партовҳои гуногун тоза гардида, дар баробари ин корҳои сафед кардану рангубори қадди роҳҳои пиёдагард ба сомон расонида шудааст. Ба партовгоҳҳо 16,9 метри мукааб партовҳо интиқол гардидааст. Боиси қайд аст, ки дар баробари ин дар шаҳри Исфара бо истифода аз техникаи махсус партовҳои бесоҳиби атрофи партовгоҳи шаҳрӣ бартараф карда шуданд.

   Дар асоси фармоиши сардори Сарраёсати ҳифзи муҳити зист дар вилояти Суғд ва бо мақсади иҷрои нақшаи корӣ аз ҷониби нозирони давлатии шуъбаи назорати давлатии истифода ва ҳифзи олами набототу ҳайвонот ва захираҳои моҳии сарраёсат дар обанбори Баҳри Тоҷик амалиёти фаврии шабонарўзӣ гузаронида шуд. Ҳангоми идомаи амалиёт дар минтақаи пойгоҳи обкашии «Маҳрам»-и шаҳри Конибодом аз дохили обанбор беш аз 1 километр тўрҳои лескагии ошкоргардидаи истеҳсоли Ҷумҳурии Чин бардошта шуда, тариқи сўзонидан несту нобуд карда шудаанд. Минбаъд низ назорати давлатӣ баҳри пешгирӣ намудани қонунвайронкунӣ дар самти истифода ва ҳифзи захираҳои моҳӣ роҳандозӣ гардида, корҳои фаҳмонидадиҳӣ байни моҳидорони ҳаваскор доир карда мешавад.