Бо мақсади беҳбудӣ бахшидан ба ҳолати экологии қадди роҳҳо, тозаву обод намудани муҳити атроф дар ҷамоати деҳоти Шаҳристон қадди роҳи автомобилгарди Душанбе - Хуҷанд партовҳои бесоҳиб бартараф карда шуд. Ин иқдом аз тарафи бахши ҳифзи муҳити зист дар ноҳияи Шаҳристон роҳандозӣ карда шуда, чунин корҳои ободониву тозакунии муҳити атроф дар шоҳроҳ ва шафати роҳҳо идома дорад.

  Тибқи нақшаи тасдиқгашта рӯзи шанбеи хафтаи сипаригашта дар шаҳри Хуҷанд оғоз аз гардиши маҳаллаи 28 то гардиши маҳаллаи 34-ум ва аз гардиши маҳаллаи 28 то МДТ Донишгоҳи давлатии Хуҷанд ба номи академик Б.Ғафуров аксияи «Тозагии маҳал ва роҳ» ташкил ва гузаронида шуд. Дар ҷараёни аксия зиёда аз 450 нафар донишҷӯён ва хонандагони муассисаҳои таҳсилоти миёнаи умумӣ фаъолона иштирок намуда, қадди кӯчаву роҳравҳо,ҷуйборҳо ва ҳудуди маҳаллаҳо аз партовҳои гуногун тоза карда шуданд. Дар натиҷа 12,3 метри мукааб партов ба партовгоҳи расмӣ бароварда шуд.

  Давоми се соли охир Сарраёсати ҳифзи муҳити зист дар вилояти Суғд баҳри татбиқи «Барномаи давлатии маҷмўии рушди тарбия ва маърифати экологии аҳолии Ҷумҳурии Тоҷикистон барои солҳои 2021-2025» бо Ташкилоти ҷамъиятии «Гурӯҳи ҷавонон оид ба ҳифзи муҳити атроф»/Маркази Орхус дар шаҳри Хуҷанд ҳамкории зич дошта, дар доираи амалисозии Лоиҳаи «Ҷалби ҷонибҳои манфиатдор дар ҳалли мушкилот оид ба партовҳои уран дар Осиёи Марказӣ, Марҳилаи II» бо 6 адад муассисаҳои таҳсилоти миёнаи умумии шаҳри Истиқлол ва 4 адад ҷамоати деҳоти Ғозиёни ноҳияи Б.Ғафуров корбарӣ менамояд. Дар ин давра раванди «Нозирони сабз» дар муассисаҳои таълимии мазкур ташкил гардида, ҳар сол як қатор чорабиниҳои гуногуни экологӣ бо мақсади рушди тарбия ва баланд бардоштани маърифати экологии хонандагон гузаронида мешавад.

 Дар доираи гузаронидани омўзиш ва таҳлили фаъолияти Комиссияи байниидоравии давлатӣ оид ба маърифати экологии аҳолӣ дар ноҳияи Мастчоҳ, мутобиқи талаботи бандҳои нақшаи чорабиниҳои «Барномаи давлатии маҷмӯии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025» ва бо мақсади баланд бардоштани маърифати экологии ҷавонон дар МДТ «Коллеҷи кишоварзии Мастчоҳ» вохўрии намояндаи Сарраёсати ҳифзи муҳити зист дар вилояти Суғд Саидов Х.М. бо беш аз 120 нафар омўзгорону донишҷўён баргузор гардид. Ҳамчунин, дар чорабинӣ директори коллеҷи мазкур Марҳамзода П., роҳбари дастгоҳи КИ ҲХДТ дар ноҳияи Мастчоҳ Ашӯров Х., мудири бахши кор бо ҷавонон ва варзиши ноҳия Азиззода С. ва мудири бахши ҳифзи муҳити зист дар ноҳия Сангинов С. иштирок доштанд.