Чиноре, ки дар ҳудуди ҷамоати деҳоти Ёрии шаҳри Панҷакент беш аз як аср инҷониб сояафканӣ намуда, муҳити зистро покиза нигоҳ медошт, аз тарафи сокинони деҳа ғайриқонунӣ бурида шудааст. Сокини ҷамоати деҳаи Ёрӣ Пӯлот Пулотов бо супориши раиси маҳаллаи Таги Равоти деҳа бе иҷозати бахши ҳифзи муҳити зисти шаҳр чиноре, ки зиёда аз 16 метр баландӣ ва дар ҳолати нашъунамо қарор дошт, ғайриқонунӣ бурида, талаботи қонунгузории амалкунандаи соҳаи ҳифзи муҳити зистро вайрон намуд. Зарари расонидашуда 1360 сомониро ташкил дода, нисбати қонуншикан маводҳои ҳуқуқвайронкунии  маъмурӣ тартиб дода  шуд.

Санаи 14 октябри соли равон дар Маркази бозомӯзии Раёсат дар  ш.Гулистон ҷаласаи машваратии назди сардори Раёсати ҳифзи муҳити зисти вилояти Суғд бо иштироки сардори шӯъбаи пешгирии ҳуқуқвайронкуниҳои характери коррупсионӣ доштаи Раёсати Агентии назорати давлатии молиявӣ ва мубориза бо коррупсияи Чумҳурии Тоҷикистон дар вилояти Суғд Наим Саломзода, намояндагони Кумитаи ҳифзи муҳити зисти назди Ҳукумати Ҷумҳурии Тоҷикистон Хайруллоев Раҳматулло ва Амрихудоев Амрихудо, кормандони мақомоти ҳифзи муҳити зисти вилоят баргузор гардид. Дар ҷаласаи машваратӣ масъалаҳои   «Стратегияи муқовимат бо коррупсияи Ҷумҳурии Тоҷикистон барои солҳои 2013 - 2020»  ва  пешниҳоди Прокуратураи вилояти Суғд аз 30.09.2016, №8/247-16(3) дар бораи бартараф кардани қонунвайронкуниҳо ҳангоми иҷрои қонунгузории ҷорӣ дар самти ҳифзи муҳити зист мавриди баррасӣ  қарор дода шуд.

Санаи 7 октябри соли равон дар толори маҷлисгоҳи маркази таълимии Бонки Миллии Ҷумҳурии Тоҷикистон  дар шаҳри  Гулистон Гуруҳи кории Иҷроиши ислоҳоти  бахши оби Тоҷикистон дар ҳавзаи Сирдарё  чорабинӣ доир намуд.

Дар он масъалаҳои ислоҳоти  бахши об дар Тоҷикистон, ҳамоҳангсозии  фаъолияти Гурӯҳи корӣ оид ба татбиқи амалии  Барномаи ислоҳот, банақшагирии ҳавзавӣ дар қисми тоҷикистонии Сирдарё, ҳамзамон давраву таҳлили ҳавза, лоиҳаҳои  шарикии Бонки Умумиҷаҳонӣ дар Тоҷикистон, танзими ҳавзаи дарёи Зарафшон аз тарафи Иттиҳоди Аврупо мавриди баррасӣ  қарор дода шуд.

Хонандагони синфи 10 «Б»-и  гимназияи ба номи Гётеи шаҳри Хуҷанд  тасмим гирифтанд, ки дар ҳифзи муҳити зист саҳм гиранд. Дар ибтидо онҳо партовҳоро ба гуруҳҳо ҷудо намуданро омӯхта, дигаронро низ ба ин кор талқин намуданд. Агар партовҳоро насӯзанд,  обу ҳаво ва хок ифлос намешавад. Дар мактаб ба ҳар як синф зарфҳои ранга гузоштанд: зардаш - барои маводҳои пластикӣ, кабудаш –барои коғазпора ва хокистарранг - барои компост. Байни хонандагон корҳои фаҳмондадиҳӣ гузаронида шуда, дар муддати кӯтоҳ ба онҳо муяссар шуд, ки 30 кг коғазпораро ҷамъоварӣ намуда барои коркард супоранд ва ҳоло аз паи ҷамъоварии  фулузот ва пластика  мебошанд.