Бо иқдоми шуъбаи ҳифзи муҳити зисти шаҳри Хуҷанд бо ҷалби ҳашарчиён ҷиҳати дар сатҳи баланд истиқбол намудани ҷашни 30 солагии Истиқлолияти давлатии Ҷумҳурии Тоҷикистон ва «Солҳои рушди деҳот, сайёҳӣ ва ҳунарҳои мардумӣ" эълон гардидани солҳои 2019-2021 дар хиёбони Раҳмон Набиев соҳили дарёи Сир аксияи «Тозагии соҳил» гузаронида шуд. Дар аксия зиёда аз 300 нафар - устодону донишҷӯёни муассисаҳои миёнаи касбӣ ва олии шаҳр иштирок намуда, соҳили дарёи Сир аз партовҳои маишӣ ва алафҳои бегона пурра тоза гардида, ба партовгоҳи шаҳр 4,5 м3 партов бароварда шуд. Боиси зикр аст, ки гузаронидани чунин аксияҳо дар доираи нақшаи чорабиниҳои мақомоти ҳифзи муҳити зист оид ба Даҳсолаи байналмилалии амал «Об барои рушди устувор, 20018-2028» мунтазам роҳандозӣ гардида истодааст. Чорабинии мазкур дар телевизионҳои маҳаллӣ инъикос карда шуд.

   Бо мақсади тозаву обод намудани маҳалли зист, бахшида ба  30-солагии Истиқлолияти давлатии Ҷумҳурии Тоҷикистон ва «Солҳои рушди деҳот, сайёҳӣ ва ҳунарҳои мардумӣ» эълон гардидани солҳои 2019-2021 дар ноҳияи Айнӣ аксияи «Тозагии маҳал» гузаронида шуд. Аксия бо ҷалби 430 нафар - аҳолии ҷамоатҳо, кормандони ташкилотҳо доир гардида, дар рафти он ҷӯйборҳо ба масофаи 3,1 км, соҳилҳои обӣ ва каналу заҳбурҳо 4,8 км, роҳравҳо ба масофаи 3,5 км тоза карда шуда, ба партовгоҳи ноҳия 1,9 м3 партов бароварда шуд. Баргузории чунин шанбегиҳои оммавӣ дар миқёси ноҳия идома дорад.

  Дар доираи нақшаи чорабиниҳо оид ба омодагӣ ва таҷлили ҷашнҳои дар пешистода, бо мақсади ҷалб намудани оммаи васеи аҳолӣ ба корҳои ободониву созандагӣ дар сойи Хоҷабоқирғони ҷамоати деҳоти Ёва-и ноҳияи Бобоҷон Ғафуров аксияи «Тозагии маҳал» бо иштироки 1514 нафар аҳолии ҷамоат, кормандони ташкилотҳо, сокинон, омӯзгорон ва хонандагони муассисаи таълимии № 10 доир гардид. Дар рафти аксия ҷӯйборҳо 9,1 км, ҳудуд 44,6 ҳазор мураббаъ, қади роҳҳо 21,4 км тоза, 823 бех дарахтон сафед карда шуда, ба партовгоҳи ноҳия ба миқдори 40,13 м3 партовҳо бароварда шуд.

  Бо мақсади тозаву озода нигоҳ доштани соҳилҳои дарё ва дигар манбаъҳои обӣ, амалӣ намудани нақшаи чорабиниҳо бахшида ба 30-солагии Истиқлолияти давлатии Ҷумҳурии Тоҷикистон дар кӯли шаҳрии Бӯстон ва шафати роҳи протоколӣ аксияи «Тозагии соҳил ва маҳал» гузаронида шуд. Дар аксия 250 нафар - намояндагони муассисаҳои тандурустиву маориф ва омӯзгорону хонандагони гимназияи № 2-и шаҳр фаъолона иштирок намуда, 1 км ҷӯйбор ва 2 км қадди роҳҳо тоза карда шуда, 8 м3 партов ба партовгоҳи шаҳр бароварда шуд.