Дар асоси нақшаи кории Раёсат, барои беталаф баровардани олами ҳайвонот ва паррандагон аз фасли зимистон бахши ҳифзи муҳити зист дар якҷоягӣ бо кормандони Муассисаи давлатии хоҷагии ҷангал дар мавзеъи Сиёҳкӯҳи шаҳри Исфара корҳои биотехникӣ гузарониданд. Рафти чорабинӣ, барои бо хӯрок таъмин намудани ҳайвонот ва паррандагон ба миқдори 950 кг дон ва гандум, 20 адад баста коҳ пошида шуд.
Бо мақсади сазовор пешвоз гирифтани Иди байналмилалии Наврӯз, бо мақсади беҳтар намудани ҳолати мелиоративии замин дар қадди роҳи Душанбе-Чаноқ, минтақаи Деҳмой зиёда аз 2 км заҳбуру заҳкашҳо тоза карда шуд. Чорабинии мазкур аз ҷониби Ассосиатсияи истифодабарандагони оби ҷамоати деҳоти Деҳмойи ноҳия тариқи ҳашар ташкил карда шуда, баҳри иҷрои қарори Ҳукумати Ҷумҳурии Тоҷикистон аз 01.08.2018, №374 «Доир ба тадбирҳои беҳтар намудани вазъи мелиоративии заминҳои обёришавандаи кишоварзии Ҷумҳурии Тоҷикистон барои солҳои 2019-2023» мусоидат менамояд.
Санаи 10 феврали соли равон дар толори раёсат маҷлиси машваратии назди сардори раёсат бо иштироки сардорони шуъбаҳо ва мудирони бахшҳои шаҳру ноҳияҳо баргузор гардид. Тибқи нақшаи пешбинигардида, дар рафти маҷлиси машваратии мазкур ду масъала баррасӣ карда шуд. Бобати масъалаи якум намояндаи Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд Ҳамдамзода Давлат бо мақсади пешгирӣ намудани содиршавии амалҳои коррупсионӣ ва дар ин замина баланд бардоштани маърифати зиддикоррупсионии кормандони мақомоти давлатӣ, ҳамчунин ҷиҳати баррасии пешниҳоди раёсати Агентӣ баромад намуд. Баъд аз он, дар доираи масъалаи дуюм сардори раёсат дар асоси таҳлили фаъолияти якмоҳаи зерсохторҳо ҷиҳати иҷрои супоришҳои ҷаласаи ҷамъбастии мушовараи Кумитаи ҳифзи муҳити зисти назди Ҳукумати Ҷумҳурии Тоҷикистон ва камбудиҳои ҷойдошта таъкид карда, барои бо натиҷаҳои назаррас ҷамъбаст намудани фаъолият дар семоҳаи якум вазифаҳои мушаххас гузошт.
Дар ноҳияи Деваштич бо мақсади тоза намудани манбаъҳои обӣ аз партовҳо, инчунин амалигардонии нақшаи чорабиниҳо бахшида ба Даҳсолаи байналмилалии амал «Об барои рушди устувор», солҳои 2018 – 2028 аксияи «Тозагии соҳил» гузаронида шуд. Дар рафти аксия кормандони бахши ҳифзи муҳити зист дар якҷоягӣ бо сокинони маҳаллаҳои «Файзобод-1» ва «Файзобод-2»-и ҷамоати шаҳраки Ғончии ноҳия, дар маҷмуъ 70 нафар фаъолона иштирок намуда, ҷиҳати тоза намудани соҳили сой аз партовҳои истеъмолию пластикӣ ва алафҳои хушк кор кардаанд. Дар натиҷа 1,3 километр ҳудуди сой тоза гардида, 3 метри мукааб партовҳо ба партовгоҳи марказии ноҳия бароварда шуд. Қайд кардан ба маврид мебошад, ки бахши ҳифзи муҳити зисти ноҳияи Деваштич якҷоя бо сокинони маҳаллаҳои ҷамоати шаҳрак ва деҳоти ноҳия баргузории чунин аксияҳои экологиро мунтазам идома медиҳад, ки ин барои баланд бардоштани маърифати экологии аҳолӣ мусоидат менамояд.
