Бо мақсади тоза намудани манбаъҳои обӣ аз партовҳо, тибқи нақшаи кории мақомоти ҳифзи муҳити зист дар ҷамоати деҳоти Ашт, Пунук, Понғоз ва Ориёни ноҳияи Ашт аксияҳо «Тозагии соҳил» бо иштироки беш аз 480 нафар намояндагони ташкилоту муассисаҳо ва аҳолии ҷамоати деҳотҳо баргузор гардид. Дар рафти аксия аз тарафи иштирокчиён 12 километр соҳили сойҳо ва ҷӯйборҳо аз партовҳои гуногуни пластикиву истеъмолӣ пурра тоза карда шуда, дар натиҷа ба миқдори 0,5 м3 партов бароварда шуд.

  Бо иқдоми шуъбаи ҳифзи муҳити зист дар шаҳри Хуҷанд, бо мақсади тозаву обод намудани муҳити атроф ва  бахшида ба сазовор истиқбол гирифтани 32 - солагии  Истиқлолияти давлатии Ҷумҳурии Тоҷикистон аксияи “Тозагии маҳал” гузаронида шуд. Дар аксия соҳибкорони инфиродии маҳал, кормандони Корхонаи воҳиди давлатии  коммуналӣ, Сарраёсати ободонӣ ва Хоҷагии манзилию коммуналии шаҳри Хуҷанд зиёда аз 50 нафар иштирок намуда,  селроҳа  оғоз аз минтақаи Роҳи Абрешим  маҳаллаи 34-ум то кӯчаи  Сирдарё бо истифода аз техника аз партовҳои гуногун ва алафҳои бегона тоза карда шуд. Дар натиҷа зиёда аз 100 м3 партовҳо ба партовгоҳи умумишаҳрӣ бароварда шуд. Бино ба маълумоти шуъбаи ҳифзи муҳити зист дар шаҳри Хуҷанд дар дигар маҳаллаҳои шаҳр низ  баргузории чунин шанбегиҳо то ҷашнҳои миллӣ пешбинӣ гардидааст.

Ҳанӯз 26 сол муқаддам санаи 27 июни соли 1997 бо имзо шудани Созишномаи умумии истиқрори сулҳ ва ризоияти миллӣ дар Тоҷикистон марҳалаи тозаи таърихи навини давлату давлатдории тоҷикон оғоз гардид. Бо сарварии Асосгузори сулҳу Ваҳдати миллӣ, Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон мардуми сарбаланди тоҷик аз имтиҳони садоқат, имон ва талоши суботу оромӣ сарбаландона гузашта тавонист. Дар таърихи навини давлатдориамон маҳз расидан ба ваҳдати миллӣ ба таҳкими давлатдории миллӣ, баланд шудани эътибори байналмилалии давлатамон, хештаншиносии мардуми тоҷик ва вусъати корҳои созандагию ободонӣ мусоидат намуд. Бо эҳтироми хоса ва ифтихори бузург ҳамаи онҳое, ки дар муҳофизати табиати диёр ва беҳдошти муҳити зист саҳмгузоранд, бо Рӯзи Ваҳдати миллӣ табрику таҳният гуфта,таманнои онро дорам, ки эҳсоси баланди ватандориву хештаншиносӣ, нангуномуси миллӣ ва ифтихор аз муқаддасиву пойдории Ваҳдати доимии халқи азизамон ҷовидона ва оламгир бошад. Рӯзи Ваҳдати миллӣ, муборак!

  Дар асоси мактуби  Кумитаи иҷрои ҳизби  халқии демократии Тоҷикистон дар вилояти Суғд бо мақсади  баланд бардоштани савияи дониши экологии  шунавандагони Мактаби захираҳои кадрҳои назди КИ ҲХДТ дар вилоят  намояндаи Сарраёсати ҳифзи муҳити зист дар вилояти Суғд Ёқубов Б.Ш. дар дарси омӯзишӣ таҳти унвони «Ҳифзи табиат омили саломатии ҷомеа» иштирок намуд. Мақсади асосии  Мактаби захираи кадрҳо  дар доираи татбиқи Барномаи давлатии «Тарбия, интихоб ва ҷо ба ҷогузории кадрҳои роҳбарикунандаи Ҷумҳурии Тоҷикистон», баланд бардоштани савияи дониши сиёсии мутахассисони ҷавони болаёқат  мебошад. Намояндаи Сарраёсат ба шунавандагон доир ба сиёсати оқилона ва дурбинонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тайи зиёда аз ду даҳсолаи охир ҷиҳати самаранок истифода бурдани захираҳои табиӣ,  эътироф гардидани  соли 2025 «Соли байналмилалии ҳифзи пиряхҳо» ва 21-уми март ҳамчун «Рӯзи ҷаҳонии пиряхҳо», татбиқи нақшаи чорабиниҳои «Барномаи давлатии маҷмўии рушди тарбия ва маърифати экологии аҳолии Ҷумҳурии Тоҷикистон барои солҳои 2021 - 2025», дигар масъалаҳои экологӣ ва роҳҳои халли он, самтҳои фаъолияти мақомоти ҳифзи муҳити зист, санадҳои меъёриву ҳуқуқӣ дар самти ҳифзи муҳити зист  баромад намуд. Рафти дарси омӯзишӣ аз тарафи шунавандагон вобаста ба экология, проблемаҳои ҷойдошта, таклифу пешниҳод баҳри беҳбудии муҳити зист дода шуд. Дар интиҳо аз тарафи намояндаи Сарраёсати ҳифзи муҳити зист дар вилоят  Ёқубов Б.Ш. ба намояндаи КИ ҲХДТ дар вилояти Суғд  ду  ҷилд  Китоби Сурхи Ҷумҳурии Тоҷикистон тақдим карда шуд.