Баҳри таъмини иҷрои нақшаи чорабиниҳо бахшида ба 30-солагии Истиқлолияти давлатӣ, дар ҷараёни сафари корӣ Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Б.А. ва сардори Раёсати ҳифзи муҳити зисти вилояти Суғд Ҳакимзода А.Қ. аз ҷараёни корҳои сохтмони бинои маъмурии бахши ҳифзи муҳити зисти шаҳри Бӯстон дидан намуданд. Бинои мазкур аз се ошёна, 5 ҳуҷраи корӣ, китобхона, толори маҷлисгоҳ ва меҳмонхона иборат аст. Айни ҳол дар гирду атрофи бино корҳои ободонӣ ва васлу насби таҷҳизотҳо идома дорад. Раиси Кумита Шерализода Б.А. ба масъулон ва сохтмончиён барои босифат анҷом додани корҳои боқимонда дастуру супоришҳо доданд.

   Зимни сафари кории Раиси Кумитаи ҳифзи мухити зисти назди Ҳукумати Ҷумҳурии Тоҷикистон Шерализода Б.А. ба вилояти Суғд аз коргоҳи коркарди партовҳои маишӣ ва коммуналӣ дар шаҳри Конибодом шиносоӣ пайдо намуданд. Коргоҳи мазкур аз ҷониби соҳибкори инфиродӣ Кодиров И. дар назди партовгоҳи шаҳрӣ дар майдони 2 га сохта ба истифода дода шудааст. Самти асосии фаъолият ҷамъ ва ба хелҳо ҷудо намудани партовҳо буда, дар як рӯз ба ҳисоби миёна 23-30 тн. партовҳо ба намудҳо ҷудо карда мешавад. Роҳбарияти коргоҳ тасмим гирифтааст, ки фаъолияти худро дар оянда васеъ намуда, шумораи коргаронро зиёд ва як сехи нав барои коркарди хоку пасмондаҳои партов бо мақсади истифодаи онҳо дар соҳаи кишоварзӣ сохта ба истифода диҳад.

Фарорасии иди Наврӯзи байналмилалии фархундапайро, ки баёнгари ҷаҳони маънавӣ, дурахши азалии донишу хирад, эҳсоси ватандорӣ ва сарчашмаи созандагии ниёгон ва аҳли диёр аст, ба Шумо самимона табрику таҳният гуфта, бароятон сарфарозию омади кор ва рўзгори бобарорро таманно дорам. Ҳарчанд тоҷикон таҷлили ин ҷашнро аз даври бостон ҳамеша дар рӯҳия ва омодагии бузург қарор додаанд, аммо расидан ба Истиқлолияти давлатӣ, сиёсати оқилона ва талоши пайгиронаи Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон имконият дод, ки мардуми тоҷик ба арзишҳои суннатии хеш аз нав руҷӯъ намояд ва таомули аз дастдодаи худро бо талабу манфиатҳои имрӯзаи ҷомеа эҳё намояд.

  Бо иқдоми мутахассисони мақомоти ҳифзи муҳити зист фаҳмонидан ва ҳадафи эълон гардидани санаҳои экологӣ аз тарафи СММ дар муассисаҳои таълимӣ ба ҳукми анъана даромадааст. Бахшида ба Рӯзи байналмилалии об, таъмини иҷрои бандҳои нақшаи чорабиниҳои Даҳсолаи байналмилалии амал «Об барои рушди устувор, 2018-2028» дар муассисаи таълимии миёнаи умумии № 15-и шаҳри Хуҷанд вохӯрии мутахассисони шуъбаи ҳифзи муҳити зист бо хонандагон доир гардид. Рафти вохӯрӣ ба мактаббачагон оид ба мақсади эълон намудани ин санаи экологӣ аз ҷониби СММ, ба масъалаҳои об дар сатҳи байналмилалӣ ҳамчун кишвари ташаббускор шинохта шудани Ҷумҳурии Тоҷикистон, ҳифз ва нигаҳдории захираҳои обӣ баромад карда шуд.Баргузории чунин вохуриву сухбатхо, тарғиби санаҳои экологӣ  барои баланд бардоштани донишу маърифати экологӣ мусоидат менамояд.