Дар шаҳри Гулистон, санаи 22 октябри соли равон дар доираи татбиқи Лоиҳаи «Идоракунии захираҳои об дар Ҷумҳурии Тоҷикистон» ва ҳамкорӣ бо Филиали Ассотсиатсияи «Хелветас Свисс Интеркооперейшн» ҷаласаи 12-уми Муқоламаи ҳавзавии Сир оид ба «Идоракунии ҳамгироёнаи захираҳои об» дар ҳавзаи дарёи Сир бо риояи талаботи санитарӣ – гигиенӣ баргузор гардид. Дар ҷаласа масъалаҳои марбут ба ислоҳоти соҳаи об, лоиҳаи «Нақшаи истифода ва ҳифзи захираҳои обӣ қисмати Тоҷикистони ҳавзаи дарёи Сир», масъалаҳои вобаста ба таъсиси Шўрои ҳавзавии дарёи Сир мавриди баррасӣ қарор дода шуд.

   Тибқи нақшаи пешбинигардида ва дархости маъмурияти ҷамоати деҳоти ба номи Исмоил Ҳамзаалиеви ноҳияи Б.Ғафуров семинар – вохўрии намояндагони шуъбаи ҳифзи муҳити зисти ноҳия бо раисони Кумитаҳои маҳалла ва сокинони фаъол баргузор гардид. Мақсади асосии баргузории вохўрии мазкур пеш аз ҳама дар баланд бардоштани маърифати экологии аҳолӣ мебошад. Аз ҷониби мутахассиси мақомоти ҳифзи муҳити зист оид ба қонунгузории амалкунандаи соҳаи ҳифзи муҳити зист суханронӣ карда шуд. Ҳамзамон, ҳангоми ба амал омадани саволу чавоб ба иштирокдорон оид ба ҳолатҳои андешидани чораҳои дар қонуну кодекс барои вайрон кардани талаботи онҳо пешбинӣ гардида,  маълумоти мушаххас дода шуд.

Бо мақсади ободу зебо гардонидани маҳалла ва кўчаҳои ноҳияи Спитамен бо иштироки намояндагони муассисаю ташкилот ва аҳолӣ аксияи «Тозагии маҳал» баргузор гардид. Дар рафти аксия корҳои сефед кадани бордюри қади роҳ – 1,7 км, рўбучини роҳравҳои пиёдагард – 2,4 км, тоза намудани ҷўйбор – 2 км ва дигар корҳои монанди рўбучини атрофи маҳали зист ба сомон расонида шуд. Дар чорабинӣ 110 нафар сокинони ноҳия иштирок карда, беш аз 18 метри мукааб партовҳо ба партовгоҳи ноҳия бароварда шуд.

    Дар кўчаҳои марказии шаҳри Хуҷанд санаи 17 октябри соли равон аксияи «Тозагии роҳ» ва омода намудани ҷўйборҳо ба боришоти фасли тирамоҳу зимистон амалӣ гардид. Дар рафти чорабинӣ намояндагони мақомоти ҳифзи муҳити зист якҷоя бо кормандони муассисаи ободонии шаҳр, намояндагони коргоҳҳои қади роҳ дар маҷмўъ, зиёда аз 180 нафар иштирок кардаанд. Дар натиҷа беш аз 7 км қади роҳ аз партовҳо тоза гардида, ҳамчунин бо мақсади тоза намудани ҷўйборҳо ва омода намудани онҳо ба боришотҳои фасли тирамоҳу зимистон корҳои мазкур дар масофаи зиёда аз 6 км ба иҷро расонида шуд. Чунин амалиёт бо истифода аз мусоидии обу ҳаво ҳар ҳафта идома дода мешавад.