Баҳри дар амал татбиқ намудани «Барномаи давлатии кабудизоркунии Ҷумҳурии Тоҷикистон барои давраи то соли 2040», бахшида Рӯзи Президенти Ҷумҳурии Тоҷикистон ва 32-юмин солгарди Иҷлосияи XVI-уми Шӯрои Олии Ҷумҳурии Тоҷикистон дар шаҳри Истаравшан корҳои ободониву кабудизоркунӣ бо маром идома доранд. Бо ташаббуси мақомоти ҳифзи муҳити зист дар маркази шаҳр ва ҷамоати шаҳрак ва деҳот баргузории аксияҳои экологӣ ташкил гардида, дар баробари корҳои бартараф кардани партовҳои бесоҳиб, тоза намудани минтақаҳои аҳолинишин, ҷӯборҳо ва қаддӣ шоҳроҳи Душанбе – Хуҷанд – Чаноқ, шинонидани гулҳои мавсимӣ ва ниҳолҳои дарахтони ҳамешасабзи санавбар амалӣ гардида истодааст. Дар давоми қариб як моҳи ахир дар ҳудуди шаҳр танҳо намуди ниҳолҳои дарахтони санавбар 1700 бех шинонида шудааст. Ҳангоми иштирок дар маъракаи ниҳолшинонӣ аз ҷониби муовини сардор ва мутахассисони Сарраёсати ҳифзи муҳити зист дар вилояти Суғдба шахсони масъули шаҳри Истаравшан ҷиҳати таъминот бо оби полезӣ ва нигоҳубини ниҳолҳо дар мавсими чорвогузар супоришҳо дода шуд.

  Дар шаҳри Хуҷанд бахшида ба 30-солагии қабули Конститутсияи Ҷумҳурии Тоҷикистон аксияҳои «Тозагии маҳал» ва «Тозагии соҳил» бо иштироки зиёда аз 600 нафар намояндагони ташкилоту муассиса ва донишҷӯён бо ташаббуси шуъбаи ҳифзи муҳити зист гузаронида шуд. Дар рафти амалӣ намудани корҳои ободонӣ 2500 метри мураббаъ ҳудуди маҳаллаи аҳолинишин ва 1200 метр ҷӯборҳо аз партовҳо тоза гардида, инчунин 1000 метр канали обгузари маҳаллаи Навбаҳори шаҳр аз партовҳои пластикӣ тоза карда шуд. Дар маҷмуъ, ҳаҷми партовҳои ба партовгоҳи шаҳрӣ интиқол дода шуда, 7 метри мукаабро ташкил намуд.

 Бо ташаббуси бахши ҳифзи муҳити зист дар шаҳри Конибодом якҷоя бо Идораи беҳдошти замин ва обёрӣ дар шаҳр бахшида ба 30-солагии қабули Конститутсияи Ҷумҳурии Тоҷикистон дар қисми ҳарбии 04080-и Вазорати мудофиаи Ҷумҳурии Тоҷикистон барои 750 нафар сарбозон дастурхони идона ороста шуд. Бо мақсади татбиқи иқдоми мазкур аз ҷониби бахши ҳифзи муҳити зист таъминоти хӯроки гарм, оши палав, сабзавоту меваҷот ба амал омада, боқимонда маводи хӯрока ва обҳои ташнашикан аз тарафи Идораи беҳдошти замин ва обёрӣ таъмин гардидааст. Дар рафти чорабинии идона ба ҳамаи сарбозону офитсерон паёми табрикии раиси шаҳри Конибодом ба муносибати 30-солагии қабули Конститутсияи Ҷумҳурии Тоҷикистон расонида шуд.

  Аз тарафи мутахассисони шуъбаи назорати давлатии истифода ва ҳифзи ҳавои атмосфераи Сарраёсати ҳифзимуҳитизист дар вилояти Суғд якҷоя бо шуъбаи милитсияи экологӣ ва сайёҳии ВКД Ҷумҳурии Тоҷикистон дар вилояти Суғд дар шоҳроҳи Хуҷанд – Ғафуров амалиёти «Ҳавои тоза» гузаронида шуд. Амалиёти мазкур бо мақсади назорат ва кам намудани ихроҷи моддаҳои ифлоскунанда ба ҳавои атмосфера аз манбаъҳои ҳаракаткунанда дар натиҷаи сӯхтани сӯзишворӣ доир гардида, воситаҳои нақлиёт аз санҷиши аналитикӣ гузаронида мешавад. Дар рафти амалиёт 58 адад нақлиётҳои автомобилии тамғаашон гуногун аз чунин санҷиш гузаронида шуда, нисбати ронандагони 8 адади онҳое, ки меъёри стандартҳои давлатиро вайрон карда, партови моддаҳои ифлоскунандаро (гази СО) ба ҳавои атмосфера барзиёд ихроҷ намудаанд, протоколҳои ҳуқуқвайронкунии маъмурӣ тартиб дода шуд. Протоколҳои тартибёфта, барои чораандешӣ ба шуъбаҳои БДА дар шаҳру ноҳия ирсол гардидаанд.