Дар доираи нақшаи чорабиниҳо оид ба омодагӣ ва таҷлили 30-солагии Истиқлолияти давлатии Ҷумҳурии Тоҷикистон дар миқёси шаҳру ноҳияҳои вилояти Суғд аксияҳои гуногуни экологии оммавӣ идома дорад. Бо иқдоми бахши ҳифзи муҳити зисти ноҳияи Айнӣ дар мавзеи варзишгоҳ воқеъ дар маркази ноҳия бо иштироки кормандони ташкилоту идораҳо ва сокинони ноҳия аксияи «Тозагии маҳал» баргузор гардид. Рафти аксия 25 тонна партов ба партовгоҳи ноҳия бароварда шуд. Баргузории чунин шанбегиву аксияҳо дар миқёси ноҳия идома дорад.

  Тибқи нақшаи корӣ, бо мақсади беҳтар намудани вазъи экологии муҳити зист, сазовор истиқбол гирифтани 30-солагии Истиқлолияти давлатии Ҷумҳурии Тоҷикистон  ба таври доимӣ тозаю озода нигоҳ доштани вазъи экологии дарёҳо, санаи 3 июли соли равон дар якҷоягӣ бо мақомоти иҷроияи ҳокимияти давлатии шаҳри Хуҷанд ва сохторҳои он дар соҳили дарёи Сир аксияи «Тозагии соҳил» гузаронида шуд.

  Тибқи супориш ва дастури Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси вилоят мӯҳтарам Раҷаббой Аҳмадзода аз тарафи Раёсати ҳифзи муҳити зисти  вилояти Суғд ба сокини деҳаи Чоркуҳ  маҳаллаи Сомониён-и  шаҳри Исфара манзили истиқоматӣ сохта пурра ба истифода дода шуд.  Манзили истиқоматӣ барои як оила  иборат аз ду хона ва долон дар муддати кӯтоҳ бунёд гардида, бо тамоми ҷиҳози зарурӣ, аз чойник то мошинаи ҷомашӯӣ, яхдону телевизор, тафдон, дарзмол, қолину пардаҳо  ва ашёҳои хоҷагидорӣ таъмин мебошад. Сокини деҳаи Чоркӯҳ аз таваҷҷуҳи хосаи Президенти мамлакат миннатдории худро баён намуда, ба роҳбарияти давлату Ҳукумат изҳори сипос намуданд.

  Ҳанӯз 24 сол муқаддам санаи 27 июни соли 1997 бо имзо шудани Созишномаи умумии истиқрори сулҳ ва ризоияти миллӣ дар Тоҷикистон марҳалаи тозаи таърихи навини давлату давлатдории тоҷикон оғоз гардид. Мардуми сарбаланди тоҷик бо сарварии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз имтиҳони садоқат, имон ва талоши суботу оромӣ сарбаландона гузашта тавонист. Дар таърихи навини давлатдориамон маҳз расидан ба ваҳдати миллӣ ба таҳкими давлатдории миллӣ, баланд шудани эътибори байналмилалии давлатамон, хештаншиносии мардуми тоҷик ва вусъати корҳои созандагию ободонӣ мусоидат намуд. Ба шарофати Ваҳдати миллӣ дар муддати ин солҳо корҳои зиёди ободониву созандагӣ дар кишвар ба анҷом расиданд. Аз ҷумла дар самти ҳифзи муҳити зист низ дигаргуниҳои куллӣ ба назар мерасанд, ки барои беҳбуд бахшидани фаъолияти кормандони мақомоти ҳифзи муҳити зист мусоидат менамояд.