Бо мақсади амалигардонии нақшаи чорабиниҳои Сарраёсати ҳифзи мухити зист дар вилоят, тозаву обод намудани муҳити зист дар шоҳроҳи Айнӣ - Чаноқ бо ҷалби васеи аҳолии  ҷамоатҳо, хонандагони МТМУ № 1 аксияи «Тозагии маҳал» гузаронида шуд. Аксия бо иштироки 175 нафар гузаронида шуда, минтақаҳои аҳолинишин ва ҷуйбору манбаҳои обӣ ба масоҳати 2 км аз партовҳои гуногун тоза карда шуда, 1,3 м3 партов бароварда шуд.

  Дар асоси нақшаи корӣ бо мақсади кам намудани ихроҷи моддаҳои зараровар ба ҳавои атмосфера, аз тарафи кормандони шуъбаи  назорати давлатии истифода ва ҳифзи ҳавои атмосфераи сарраёсат ва бахши ҳифзи муҳити зист дар шаҳри Бӯстон, дар ҳамкорӣ бо кормандони шуъбаи милитсияи экологӣ ва сайёҳии ВКД-и Ҷумҳурии Тоҷикистон дар вилоят дар кӯчаи марказии нақлиётгарди даромади шаҳр амалиёти «Ҳавои тоза» гузаронида шуд. Дар маҷмўъ, дар рафти амалиёт 33 адад нақлиётҳои тамғаашон гуногун аз санҷиши аналитикӣ гузаронида шуда, миқдори партови моддаҳои ифлоскунанда ба ҳавои атмосфера дар натиҷаи сӯхтани сӯзишворӣ муайян гардид. Нисбати ронандагони 4 адад воситаҳои нақлиёте, ки меъёри стандартҳои давлатиро вайрон карда, партови моддаҳои ифлоскунандаро (гази СО) ба фазои атмосфера барзиёд ихроҷ намудаанд, протоколҳои ҳуқуқвайронкунии маъмурӣ тартиб дода шуд ва барои чораандешӣ ба БДА-и шаҳру ноҳия ирсол гардид.

  Аз соли 1995 инҷониб ҷомеаи ҷаҳонӣ санаи 16 сентябрро ҳамчун Рӯзи байналмилалии ҳифзи қабати озон таҷлил менамоянд, ки ин бо қарори Ассамблеяи Генералии Созмони Милали Муттаҳид бахшида ба имзо расидани Протоколи Монреал (1987) ба амал омадааст. Нақши қабати озон дар ҳаёт хеле муҳим буда, барои мавҷудияти ҳаёт дар рӯи замин нақши муҳимро мебозад. Он ҳамчун сипар инсон ва дигар мавҷудоти зиндаро аз таъсири хатаровари нуриҳои зарарноки ультрабунафши офтоб муҳофизат менамояд. Камшавии миқдори озон дар қабати он ба пастшавии қобилияти муҳофизавии он оварда мерасонад ва дар натиҷа таъсири радиатсияи ультрабунафш ба муҳити зист ва саломатии инсон зарар мерасонад, бахусус ба суст шудани масъунияти бадани одам аз сабаби вайроншави ДНК, пайдошавии бемориҳои саратони пӯст, катарактаи чашм, диққи нафас, харобшавии асаб, шуш ва дигар бемориҳо  оварда мерасонад. Ҳамчунин дар натиҷаи афканишоти нурҳои ултрабунафш таъсири манфӣ ба зироатҳои хоҷагии қишлоқ мерасад, бахусус онҳо боиси тағйиротҳои ҷиддии таркиби химиявии растаниҳо мегарданд. Баландшавии радиатсия ба сифати маҳсулотҳо ба монанди помидор, картошка, лаблабуи қанд, карам, лӯбиё таъсир расонида, сифати онҳоро паст менамояд.

 Дар асоси дастуру супоришҳои Президенти мамлакат муҳтарам Эмомалӣ Раҳмон ба муносибати ҷашни умумимиллӣ - 32-солагии Истиқлоли давлатӣ 9 сентябр дар Боғи фарҳангу фароғатии ба номи Абулқосим Фирдавсии шаҳри Душанбе  Сарраёсати ҳифзи муҳити зисти вилоят вилоят дар намоишгоҳи маҳсулоти саноатию кишоварзӣ иштирок намуд. Дар намоишгоҳ аз тарафи Ҷамъияти дорои масъулияти маҳдуди “Корпоратсияи моҳии тоҷик”-и вилоят навъҳои гуногуни моҳӣ ва маҳсулоти аз онҳо омодашуда ба намоиш бароварда шуд. Бо мақсади амалӣ намудани  “Барномаи рушди соҳаи моҳипарварӣ дар Ҷумҳурии Тоҷикистон”, афзоиш ва зиёд намудани захираҳои моҳӣ  Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ба дарёчае, ки аз ҳудуди Боғи фарҳангию фароғатии ба номи Абулқосим Фирдавсӣ мегузарад, даҳ ҳазор адад моҳиҳои  навъи “амури сафед” ва «пешонапаҳн»-ро  сар доданд.